ભાવનગર જિલ્લાના તળાજા તાલુકામાં એક અત્યંત દુઃખદ ઘટના સામે આવી છે. તળાજા તાલુકાના મથાવડા ગામ પાસે આવેલા ચેકડેમમાં નહાવા કે અન્ય કોઈ કારણોસર ગયેલા ચાર યુવાનો અચાનક પાણીના ઊંડાણમાં ગરકાવ થઈ ગયા હતા. ઘટનાની જાણ થતાં જ આસપાસના ગ્રામજનો અને સ્થાનિક લોકો સ્થળ પર દોડી આવ્યા હતા.
ઘટનાની ગંભીરતાને ધ્યાનમાં રાખીને તાત્કાલિક તળાજા ફાયર વિભાગ અને સ્થાનિક કુશળ તરવૈયાઓની મદદ લેવામાં આવી હતી. ફાયર વિભાગના કર્મચારીઓ અને સ્થાનિક તરવૈયાઓએ ભારે જહેમત અને કલાકોની મુશ્કેલ કામગીરી બાદ ચેકડેમના ઊંડા પાણીમાંથી ચારેય યુવાનોને બહાર કાઢ્યા હતા.
પાણીમાંથી બહાર કાઢ્યા બાદ ચારેય યુવાનોની હાલત ગંભીર હોવાથી તેમને સૌપ્રથમ તાત્કાલિક સારવાર અર્થે તળાજાની ખાનગી હોસ્પિટલમાં લઈ જવામાં આવ્યા હતા. ત્યારબાદ વધુ અને ગહન સારવાર માટે તેમને તળાજાની સરકારી હોસ્પિટલ ખાતે ખસેડવામાં આવ્યા હતા. જોકે, હોસ્પિટલમાં ફરજ પરના તબીબોએ ચકાસણી કરીને બે યુવાનોને મૃત જાહેર કર્યા હતા, જ્યારે અન્ય બે યુવાનોને યોગ્ય સારવાર આપવામાં આવી રહી છે.
આ કરુણ દુર્ઘટનામાં જીવ ગુમાવનાર બંને યુવાનો સ્થાનિક વિસ્તારના જ હોવાનું સામે આવ્યું છે. જેમાં મિલનભાઈ ગોવિંદભાઈ શીયાળ (ઉંમરઃ ૧૯ વર્ષ) અને તુષારભાઈ ગંભીરભાઈ શીયાળ (ઉંમરઃ ૧૮ વર્ષ)નો સમાવેશ થાય છે. નાની વયના બે બળુકા યુવાનોના અકાળે અવસાનથી મથાવડા ગામ અને સમગ્ર તળાજા પંથકમાં ભારે શોકનું મોજું ફરી વળ્યું છે અને પરિવારજનોમાં અરેરાટી વ્યાપી ગઈ છે.
