જિલ્લા પંચાયતની ૩૪ બેઠકો માટે પર.૯૯ ટકા મતદાન, આવતીકાલે મત ગણતરી
ગુજરાત રાજ્ય ચૂંટણી આયોગ દ્વારા આયોજિત સ્થાનિક સ્વરાજ્યની સંસ્થાઓની સામાન્ય અને પેટા ચૂંટણી-એપ્રિલ ૨૦૨૬ અંતર્ગત અમરેલી જિલ્લામાં રવિવારે મતદાનની પ્રક્રિયા અત્યંત શાંતિપૂર્ણ અને સુમેળભર્યા વાતાવરણમાં પૂર્ણ થઈ હતી. વહીવટી તંત્ર દ્વારા કરવામાં આવેલી સુદ્રઢ વ્યવસ્થા અને ચુસ્ત પોલીસ બંદોબસ્તને કારણે સમગ્ર જિલ્લામાં ક્યાંય પણ અનિચ્છનીય બનાવ નોંધાયો નથી.
અમરેલી જિલ્લામાં જિલ્લા પંચાયત, ૦૬ નગરપાલિકાઓ અને ૧૧ તાલુકા પંચાયતો માટે સવારના ૭ઃ૦૦ વાગ્યાથી સાંજના ૬ઃ૦૦ વાગ્યા સુધી સઘન મતદાન યોજાયું હતું. વિવિધ સ્તરે થયેલા મતદાનની વિગત આ મુજબ છે. જેમાં જિલ્લા પંચાયતની સામાન્ય ચૂંટણીમાં કુલ ૮,૬૪,૮૮૦ નોંધાયેલા મતદારોમાંથી અંદાજે ૫૨.૯૯ ટકા મતદાન નોંધાયું છે. જેમાં ૨,૫૭,૧૯૧ પુરુષો અને ૨,૦૧,૧૧૦ મહિલાઓએ પોતાના મતાધિકારનો ઉપયોગ કર્યો હતો.
અમરેલી, બાબરા, સાવરકુંડલા, ધારી, બગસરા અને દામનગર એમ કુલ ૦૬ નગરપાલિકાઓના ૪૫ વોર્ડની ૧૭૪ બેઠકો પર અંદાજે ૫૭.૯૧ ટકા મતદાન થયું હતું. કુલ ૨,૦૭,૮૮૧ મતદારોમાંથી અંદાજે ૬૬,૮૦૮ પુરુષ અને ૫૩,૫૬૪ મહિલા મતદારોએ મતદાન કર્યું હતું.
જિલ્લાની ૧૧ તાલુકા પંચાયતોની ૧૮૬ બેઠકો પર અંદાજે ૫૨.૮૯ ટકા મતદાન નોંધાયું હતું. અહીં કુલ ૮,૪૮,૬૧૨ મતદારો નોંધાયેલા હતા, જેમાંથી ૪,૪૮,૭૯૫ મતદારોએ લોકશાહીના આ પર્વમાં ભાગ લીધો હતો. ચૂંટણી સાથે સંકળાયેલા તમામ કર્મચારીઓ અને સુરક્ષાકર્મીઓની નિષ્ઠાપૂર્વકની કામગીરીને કારણે જ આટલી વિશાળ પ્રક્રિયા સરળતાથી સંપન્ન થઈ શકી છે. આવતીકાલે દરેક તાલુકા મથક પર મતગરી થશે ત્યારે મતદારોએ કોના પર પસંદગીનો કળશ ઢોળ્યો છે તે ખબર પડશે.
