ભારતે સંયુક્ત રાષ્ટ્રમાં પાકિસ્તાનને યોગ્ય જવાબ આપ્યો છે. સંયુક્ત રાષ્ટ્રમાં ભારતના કાયમી પ્રતિનિધિ પી. હરીશે પાકિસ્તાનને ચેતવણી આપી છે કે તેને સરહદ પાર આતંકવાદ માટે ગંભીર પરિણામો ભોગવવા પડશે. ભારતને સરહદપાર આતંકવાદ સામે પોતાનો બચાવ કરવાનો સંપૂર્ણ અધિકાર છે. વધુમાં, ભારતીય પ્રતિનિધિએ પાકિસ્તાનને તમામ પ્રકારના આતંકવાદને ટેકો આપવાનું બંધ કરવાની સલાહ આપી.
પી. હરીશે કહ્યું, “પાકિસ્તાન દ્વારા કરવામાં આવેલી પાયાવિહોણી અને બિનજરૂરી ટિપ્પણીઓનો જવાબ આપવો જરૂરી છે. ભારત હકીકતો સ્પષ્ટ કરવા માંગે છે. સ્વતંત્ર ભારતે પાકિસ્તાન તરફથી સરહદપાર આક્રમણ સામે લડીને પોતાનું જીવન શરૂ કર્યું હતું, જે સંપૂર્ણ, કાયદેસર અને અટલ જાડાણના પરિણામે ભારતનો ભાગ બનેલા ભારતીય પ્રદેશો પર પોતાનો અધિકાર સ્થાપિત કરવાનો પ્રયાસ કરતો હતો.”
તેમણે વધુમાં કહ્યું, “પાકિસ્તાને અસંખ્ય યુદ્ધો કરીને, ભારત સામે ઉશ્કેરણી વિના આક્રમણ કરીને અને સરહદપાર આતંકવાદને સતત પ્રાયોજિત કરીને સાર્વભૌમત્વ, પ્રાદેશિક અખંડિતતા અને શાંતિપૂર્ણ સહઅસ્તીત્વના સિદ્ધાંતોનું ઉલ્લંઘન કર્યું છે. પાકિસ્તાન દ્વારા સરહદપાર આતંકવાદનો ઉપયોગ અને ‘હજાર કાપ સાથે ભારતને લોહી વહેવડાવવું’ ની તેની નીતિ યુએન ચાર્ટર પ્રત્યેની તેની પોકળ પ્રતિબદ્ધતાને છતી કરે છે.સંયુક્ત રાષ્ટ્રમાં ભારતના કાયમી પ્રતિનિધિએ જણાવ્યું હતું કે ભારતને આવા સરહદ પારના આતંકવાદ સામે પોતાનો બચાવ કરવાનો સંપૂર્ણ અધિકાર છે. પાકિસ્તાને એ સ્વીકારવું જાઈએ કે સરહદ પારના આતંકવાદને પ્રોત્સાહન આપવાના પરિણામો આવે છે. આતંકવાદ, ધાર્મિક ઉગ્રવાદ, હિંસક કટ્ટરવાદ અને ભારત વિરોધી વાણી-વર્તન જેવી દુર્ભાવનાપૂર્ણ શક્તિઓનો ઉપયોગ તેની સ્થાપનાથી જ અવિરત ચાલુ રહ્યો છે.
તેમણે સ્પષ્ટતા કરી, “આ સંદર્ભમાં તથ્યો જાહેર રેકોર્ડ પર છે અને વધુ સ્પષ્ટતાની જરૂર નથી. પાકિસ્તાને વિશ્વસનીય અને અટલ રીતે તેના તમામ સ્વરૂપોમાં આતંકવાદને ટેકો આપવાનો અંત લાવવો જાઈએ.”
