પાકિસ્તાન ક્રિકેટ ટીમ ભવિષ્યમાં આગળ વધવાને બદલે રિવર્સ ગિયરમાં પોતાનું વાહન મૂકી રહી હોય તેવું લાગે છે.પીસીબીએ વેસ્ટ ઇન્ડિઝ અને ઈંગ્લેન્ડ સામેની આગામી ટેસ્ટ શ્રેણી માટે ટીમની જાહેરાતમાં કેટલાક આશ્ચર્યજનક નિર્ણયો જાહેર કર્યા છે. તેમણે શાન મસૂદને કેપ્ટનશીપમાંથી દૂર કર્યા છે અને બાબર આઝમને ફરીથી કેપ્ટનશીપ સોંપી છે. વધુમાં, ટેસ્ટ ટીમમાં કેટલાક નોંધપાત્ર ફેરફારો પણ જાવા મળ્યા છે, જેમાં સ્ટાર ફાસ્ટ બોલર શાહીન આફ્રિદીને પડતો મૂકવામાં આવ્યો છે.
પીસીબીએ ટીમમાં કેટલાક મહત્વપૂર્ણ ફેરફારો કર્યા છે, જેમાં બાબર આઝમને ફરીથી ટીમમાં સામેલ કરવામાં આવ્યા છે, જેમણે છેલ્લે ડિસેમ્બર ૨૦૨૪ માં પાકિસ્તાની ટેસ્ટ ટીમનું નેતૃત્વ કર્યું હતું. શાહીન આફ્રિદી ઉપરાંત, હસન અલી અને નૌમાન અલીને પણ વેસ્ટ ઇન્ડિઝ અને ઈંગ્લેન્ડ પ્રવાસ માટે જાહેર કરાયેલ પાકિસ્તાન ટેસ્ટ ટીમમાંથી બહાર કરવામાં આવ્યા છે. દરમિયાન, ટીમની જાહેરાત દરમિયાન, પાકિસ્તાની પસંદગીકાર આકિબ જાવેદે જણાવ્યું હતું કે શકીલને ફિટનેસ સમસ્યાઓના કારણે વેસ્ટ ઇન્ડિઝ સામેની શ્રેણી માટે પસંદ કરવામાં આવ્યો નથી અને તે ઈંગ્લેન્ડ પ્રવાસ પહેલા સંપૂર્ણપણે ફિટ થવાની અપેક્ષા છે. મોહમ્મદ અલી અને આમિર જમાલ ૧૬ સભ્યોની પાકિસ્તાની ટીમમાં પાછા ફર્યા છે. વધુમાં, ઉબેદ શાહ, સ્પિનર અલી ઉસ્માન અને અવૈસ ઝફરનો પ્રથમ વખત સમાવેશ કરવામાં આવ્યો છે.
વેસ્ટ ઇન્ડિઝ અને ઈંગ્લેન્ડ સામેની ટેસ્ટ શ્રેણી માટે પાકિસ્તાનની ટીમઃ બાબર આઝમ (કેપ્ટન), શાન મસૂદ, આમિર જમાલ, સલમાન અલી આગા, અબ્દુલ્લા ફઝલ, અલી ઉસ્માન, અઝાન અવૈસ, ઇમામ-ઉલ-હક, ખુર્રમ શહઝાદ, મોહમ્મદ અબ્બાસ, મોહમ્મદ અલી, મોહમ્મદ રિઝવાન (વિકેટકીપર), ઉબૈદ શાહ, મોહમ્મદ અવૈસ ઝફર, મોહમ્મદ ગાઝી ગૌરી અને સાજિદ ખાન.
પાકિસ્તાની ટીમ જુલાઈના અંતમાં બે ટેસ્ટ મેચ માટે વેસ્ટ ઇન્ડિઝ જવા રવાના થશે. પહેલી મેચ ૨૫ જુલાઈથી ત્રિનિદાદના સ્ટેડિયમમાં અને બીજી ટેસ્ટ મેચ ૨ ઓગસ્ટથી ત્રિનિદાદના સ્ટેડિયમમાં રમાશે. આ શ્રેણી પૂર્ણ થયા પછી, પાકિસ્તાની ટીમ ઈંગ્લેન્ડ જશે, જ્યાં તેઓ ૧૯ ઓગસ્ટથી હેડિંગ્લી ખાતે ત્રણ મેચની ટેસ્ટ શ્રેણીની પહેલી મેચ રમશે. બીજી ટેસ્ટ મેચ ૨૭ ઓગસ્ટથી લોર્ડ્સ ખાતે રમાશે અને શ્રેણીની અંતિમ મેચ ૯ સપ્ટેમ્બરથી એજબેસ્ટન ખાતે રમાશે.
