દક્ષિણ આફ્રિકામાં ગુરુવારે એક મિનિબસ, ટેક્સી અને ટ્રક વચ્ચે જારદાર ટક્કર થઈ. આ અકસ્માત પૂર્વીય ક્વાઝુલુ-નાતાલ પ્રાંતના ડર્બન શહેર નજીક થયો. આ અકસ્માતમાં ઓછામાં ઓછા ૧૧ લોકો માર્યા ગયા હતા. દક્ષિણ આફ્રિકાના સ્થાનિક સરકારી અધિકારીઓ અને કટોકટી સેવાઓએ આ માહિતી પૂરી પાડી હતી. તેમણે એ પણ નોંધ્યું હતું કે એક અઠવાડિયા પહેલા, સમાન માર્ગ અકસ્માતમાં ૧૪ શાળાના બાળકો માર્યા ગયા હતા.
પ્રાંતીય પરિવહન વિભાગના અધિકારી સિબોનિસો ડુમાએ એક નિવેદનમાં જણાવ્યું હતું કે તમામ ૧૧ લોકોના ઘટનાસ્થળે જ મોત થયા હતા. મૃતકોમાં એક શાળાનો બાળક પણ સામેલ છે. “સાક્ષીઓએ આરોપ લગાવ્યો છે કે ટ્રક ડ્રાઈવરે યુ-ટર્ન લીધો હતો, જેના કારણે સામસામે ટક્કર થઈ હતી,” ડુમાએ જણાવ્યું હતું. ખાનગી પેરામેડિક સેવા એએલએસ પેરામેડિક્સના પ્રવક્તા ગેરેથ જેમિસને જણાવ્યું હતું કે ૧૧ લોકો માર્યા ગયા હતા અને ઘણા લોકો ગંભીર રીતે ઘાયલ થયા હતા, જેમાં કાટમાળમાં ફસાયેલા મિનીબસ ડ્રાઈવરનો પણ સમાવેશ થાય છે.
એક અઠવાડિયા પહેલા, ૧૯ જાન્યુઆરીના રોજ, જાહાનિસબર્ગ નજીક એક સમાન અકસ્માત થયો હતો, જ્યાં સ્કૂલના બાળકોને લઈ જતી એક મિનિબસ એક ટ્રક સાથે સામસામે અથડાઈ હતી, જેમાં ૧૪ બાળકોના મોત થયા હતા. તે અકસ્માતમાં સંડોવાયેલા મિનિબસ ડ્રાઇવરની ધરપકડ કરવામાં આવી હતી અને તેના પર હત્યાના ૧૪ ગુનાનો આરોપ મૂકવામાં આવ્યો હતો, કારણ કે અધિકારીઓએ આરોપ લગાવ્યો હતો કે તે બેદરકારીથી વાહન ચલાવી રહ્યો હતો અને વાહનોની લાઇનને ઓવરટેક કરવાનો પ્રયાસ કરતી વખતે ટ્રક સાથે અથડાઈ ગયો હતો. ૨૨ વર્ષીય ડ્રાઇવર પર શરૂઆતમાં હત્યા સમાન ગુનાનો આરોપ મૂકવામાં આવ્યો હતો, પરંતુ રાજ્યના વકીલોના જણાવ્યા અનુસાર, આરોપોને હત્યાના ગુનામાં અપગ્રેડ કરવામાં આવ્યા હતા. દક્ષિણ આફ્રિકામાં મોટાભાગના લોકો માટે મિનિબસ ટેક્સીઓ પસંદગીનું જાહેર પરિવહન છે, અંદાજે ૭૦ ટકા મુસાફરો તેનો ઉપયોગ કરે છે.
