ધોરાજી અને જામકંડોરણા વચ્ચે એક ગંભીર માર્ગ અકસ્માત સર્જાયો હતો. જૂનાગઢથી પરત પોતાના ગામે જઈ રહેલો એક ટેમ્પો ધોરાજીની હદ નજીક પહોંચ્યો ત્યારે અચાનક તેમાં કોઈ અકસ્માત સર્જનારી ટેક્નિકલ ખામી સર્જાઈ હતી. આ ખામીના કારણે ડ્રાઈવરે સ્ટીયરીંગ પરથી કાબૂ ગુમાવી દીધો હતો અને ટેમ્પો રોડ પર જ ધડાકાભેર પલટી મારી ગયો હતો. આ ગમખ્વાર અકસ્માતને પગલે સ્થાનિક લોકો દોડી આવ્યા હતા. આ અકસ્માતમાં ટેમ્પોમાં સવાર ત્રણ વ્યક્તિઓને શરીરે નાની-મોટી ગંભીર ઈજાઓ પહોંચી હતી. ઘટનાની જાણ થતાં જ ૧૦૮ એમ્બ્યુલન્સની ટીમ તાત્કાલિક ઘટનાસ્થળે દોડી ગઈ હતી અને તમામ ઈજાગ્રસ્તોને પ્રાથમિક સારવાર આપીને ધોરાજીની સરકારી હોસ્પિટલમાં ખસેડ્યા હતા. જો કે, ઈજાગ્રસ્તો પૈકી એક વ્યક્તિની તબિયત અત્યંત નાજુક અને ગંભીર જણાતા, તેને વધુ સઘન અને તાત્કાલિક સારવાર અર્થે જૂનાગઢની હોસ્પિટલમાં રીફર કરવામાં આવ્યા છે.
