વીડી સતીસે કેરળના મુખ્યમંત્રી તરીકે શપથ લીધા છે. રાજ્યપાલ રાજેન્દ્ર આર્લેકરે પદ અને ગુપ્તતાના શપથ લેવડાવ્યા. કોંગ્રેસના ટોચના નેતાઓ રાહુલ ગાંધી, પ્રિયંકા ગાંધી, મલ્લીકાર્જુન ખડગે અને કર્ણાટક અને હિમાચલ પ્રદેશના મુખ્યમંત્રીઓ સહિત અનેક અન્ય ટોચના નેતાઓ હાજર રહ્યા હતા. વીડી સતીસનો શપથ ગ્રહણ સમારોહ તિરુવનંતપુરમના સેન્ટ્રલ સ્ટેડિયમમાં યોજાયો હતો. મુખ્યમંત્રીની સાથે આજે તેમના સમગ્ર મંત્રીમંડળે પણ શપથ લીધા. મીડિયા સાથે વાત કરતા સીએમ વીડી સતીસને કહ્યું કે ૬૦ વર્ષ પછી, સમગ્ર યુડીએફ મંત્રીમંડળે એકસાથે શપથ લીધા.
સતીસનના મંત્રીમંડળમાં વીસ મંત્રીઓનો સમાવેશ કરવામાં આવ્યો છે અને સોમવારે રાજ્યપાલ દ્વારા તેમને શપથ લેવડાવવામાં આવ્યા હતા. કોંગ્રેસના ટોચના નેતાઓ ઉપરાંત, ભૂતપૂર્વ મુખ્યમંત્રી અને ડાબેરી નેતા પિનરાઈ વિજયન અને ભાજપના નેતા રાજીવ ચંદ્રશેખરન પણ મુખ્યમંત્રીના શપથ ગ્રહણ સમારોહમાં હાજર રહ્યા હતા. રાજ્યના વિવિધ ભાગોમાંથી હજારો કોંગ્રેસ કાર્યકરો શપથ ગ્રહણ સમારોહમાં હાજરી આપવા માટે રાજ્યની રાજધાનીમાં પહોંચ્યા છે. ૧૪૦ સભ્યોની કેરળ વિધાનસભાની ચૂંટણી ૯ એપ્રિલે યોજાઈ હતી અને ૪ મેના રોજ પરિણામો જાહેર થયા હતા. કોંગ્રેસના નેતૃત્વ હેઠળના યુડીએફ ગઠબંધને ૧૦૨ બેઠકો જીતી હતી, જ્યારે એલડીએફને ૩૫ અને ભાજપને ત્રણ બેઠકો મળી હતી.
વીડી સતીસન કેબિનેટમાં પાર્ટીના નેતાઓમાં કોંગ્રેસ વીડી સતીસન (મુખ્યમંત્રી),કોંગ્રેસ રમેશ ચેન્નીથલા,કોંગ્રેસ સન્ની જાસેફ,કોંગ્રેસ કે મુરલીધરન,કોંગ્રેસ એપી અનિલ કુમાર,કોંગ્રેસ પીસી વિષ્ણુનાથ,કોંગ્રેસ રોઝી એમ જાન,કોંગ્રેસ બિંદુ કૃષ્ણા,કોંગ્રેસ એમ લીજુ,કોંગ્રેસ ટી સિદ્દીકી,કોંગ્રેસ કેએ તુલસી,કોંગ્રેસ ઓજે જાનિશ,આઈયુએમએલ પીકે કુન્હાલીકુટ્ટી,આઈયુએમએલ એન શમસુદ્દીન,આઈયુએમએલ કેએમ શાજી,આઈયુએમએલ પીકે બશીર,આઈયુએમએલ વાય અબ્દુલ ગફૂર,કેરળ કોંગ્રેસ મોન્સ જાસેફ,કેરળ કોંગ્રેસ (જેકબ) અનૂપ જેકબ,આરએસપી શિબુ બેબી જાન,સીએમપી સીપી જાન સમાવેશ થાય છે
વી.ડી. સતીસનનું પૂરું નામ વડસેરી દામોદરન સતીસન છે. તેમનો જન્મ ૩૧ મે, ૧૯૬૪ ના રોજ કેરળના કોચીના નેત્તૂરમાં એક નાયર પરિવારમાં થયો હતો. તેમના પિતાનું નામ કે. દામોદરન મેનન અને માતાનું નામ વી. વિલાસિની અમ્મા છે. વીડી સતીસનને ગ્રાસરૂટ નેતા માનવામાં આવે છે. સતીસને કોચીની રાજગીરી કોલેજ ઓફ સોશિયલ સાયન્સમાંથી માસ્ટર ઓફ સોશિયલ વર્કની ડિગ્રી મેળવી હતી. રાજકારણમાં પ્રવેશતા પહેલા તેમણે કાયદાનો પણ અભ્યાસ કર્યો હતો. તેમણે કેરળ લો એકેડેમીમાંથી એલએલબી અને તિરુવનંતપુરમની સરકારી લો કોલેજમાંથી માસ્ટર ઓફ લો (એલએલએમ) ની ડિગ્રી મેળવી હતી. વીડી સતીસનને વાંચનનો શોખ છે.
વીડી સતીસન તેમના વિદ્યાર્થીકાળ દરમિયાન રાજકારણમાં પ્રવેશ્યા હતા અને કેરળ વિદ્યાર્થી સંઘ સાથે સંકળાયેલા હતા. તેમણે એનએસયુઆઈના રાષ્ટ્રીય સચિવ તરીકે પણ સેવા આપી હતી. વ્યવસાયે વકીલ, તેમણે લગભગ ૧૦ વર્ષ સુધી હાઈકોર્ટમાં કાયદાનો અભ્યાસ કર્યો. તેમની કાનૂની કારકિર્દી દરમિયાન, તેઓ ચૂંટણી રાજકારણમાં સક્રિય બન્યા.
પીએમ મોદીએ ઇન્સ્ટાગ્રામ પર એક પોસ્ટમાં સતીસનને અભિનંદન આપ્યા. પીએમએ કહ્યું, “કેરળના મુખ્યમંત્રી તરીકે શપથ લેવા બદલ વીડી સતીસનને હાર્દિક અભિનંદન. તેમના કાર્યકાળ માટે મારી શુભકામનાઓ. કેન્દ્ર સરકાર નવી રચાયેલી કેરળ સરકારને લોકોની આકાંક્ષાઓ પૂર્ણ કરવા માટે તમામ શક્ય સમર્થનની ખાતરી આપે છે.૨૧ સભ્યોના કેરળ મંત્રીમંડળમાં પહેલીવાર ૧૪ મંત્રીઓનો સમાવેશ થાય છે. આમાં બે મહિલા અને અનુસૂચિત જાતિ (એસસી) સમુદાયના બે મંત્રીઓનો સમાવેશ થાય છે. બાર મંત્રીઓ કોંગ્રેસ ક્વોટાના, પાંચ મુસ્લીમ લીગના અને એક-એક અન્ય ચાર સાથી પક્ષોના છે.” ૧૨ મંત્રીઓ લઘુમતી સમુદાયના છેઃ છ મુસ્લીમ અને છ ખ્રિસ્તી. પાંચ મુસ્લીમ મંત્રીઓ મુસ્લીમ લીગના છે, જ્યારે એક કોંગ્રેસનો છે. નવ હિન્દુ ધારાસભ્યોને મંત્રી તરીકે નિયુક્ત કરવામાં આવ્યા છે, જેમાં બે દલિતનો સમાવેશ થાય છે. ચાર હિન્દુ મંત્રીઓ નાયર સમુદાયના છે, કોંગ્રેસના વરિષ્ઠ ધારાસભ્ય તિરુવંચુર રાધાકૃષ્ણનને વિધાનસભાના અધ્યક્ષ તરીકે નિયુક્ત કરવામાં આવશે, જ્યારે વરિષ્ઠ મહિલા નેતા શનિમોલ ઉસ્માન ડેપ્યુટી સ્પીકર તરીકે સેવા આપશે. કેરળ કોંગ્રેસના ધારાસભ્ય (જાસેફ) મુખ્ય દંડક હશે.
