રાજધાની હનોઈ પહોંચ્યા પછી, સંરક્ષણ પ્રધાન રાજનાથ સિંહે વિયેતનામના રાષ્ટ્રીય સંરક્ષણ પ્રધાન જનરલ ફાન વાન ગિઆંગ સાથે મંત્રી સ્તરની દ્વિપક્ષીય બેઠક યોજી. વિયેતનામના રાષ્ટÙપતિ ટુ લામની નવી દિલ્હી મુલાકાત દરમિયાન બંને દેશોએ તેમના સંબંધોને એડવાન્સ્ડ કોમ્પ્રીહેન્સિવ સ્ટ્રેટેજિક પાર્ટનરશિપના સ્તરે પહોંચાડ્યાના થોડા દિવસો પછી જ સંરક્ષણ પ્રધાન સિંહની વિયેતનામ મુલાકાત આવી છે.
આ મુલાકાતનો હેતુ લશ્કરી સાધનોના સંયુક્ત ઉત્પાદન સહિત વ્યૂહાત્મક સંરક્ષણ સહયોગને મજબૂત કરવાના પગલાંઓની ચર્ચા કરવાનો છે. વિયેતનામની રાજધાની હનોઈ જતા પહેલા રાજનાથ સિંહે જણાવ્યું હતું કે બંને એશિયાઈ દેશોની તેમની મુલાકાતનો મુખ્ય ઉદ્દેશ્ય સંરક્ષણ ઔદ્યોગિક ભાગીદારીને મજબૂત બનાવવા, દરિયાઈ સહયોગને પ્રોત્સાહન આપવા અને ઈન્ડો-પેસિફિક ક્ષેત્રમાં શાંતિ અને સ્થિરતાને પ્રોત્સાહન આપવાનો રહેશે.
વિયેતનામનો પ્રવાસ પૂર્ણ કર્યા પછી, સંરક્ષણ પ્રધાન મંગળવારે ત્રણ દિવસની મુલાકાતે દક્ષિણ કોરિયા જશે. આ મુલાકાત દરમિયાન, બંને પક્ષો દક્ષિણ ચીન સમુદ્રની વર્તમાન પરિસ્થિતિ પર પણ ચર્ચા કરશે. તાજેતરના વર્ષોમાં આ ક્ષેત્રમાં ચીનની લશ્કરી પ્રવૃત્તિઓમાં વધારો થયો છે. હાઇડ્રોકાર્બનના વિશાળ સ્ત્રોત, દક્ષિણ ચીન સમુદ્ર પર ચીનના વ્યાપક સાર્વભૌમત્વના દાવાઓ અંગે ચિંતાઓ વધી રહી છે. વિયેતનામ, ફિલિપાઇન્સ અને બ્રુનેઈ જેવા ક્ષેત્રના ઘણા દેશો પણ દક્ષિણ ચીન સમુદ્ર પર અલગ અલગ દાવાઓ ધરાવે છે.
ભારત અને અન્ય ઘણા લોકશાહી દેશોએ આ વિવાદોના શાંતિપૂર્ણ ઉકેલ અને આંતરરાષ્ટ્રીય કાયદા, ખાસ કરીને યુએનસીએલઓએસ (સમુદ્રના કાયદા પર સંયુક્ત રાષ્ટ્ર સંમેલન)નું પાલન કરવા પર સતત ભાર મુક્યો છે. અધિકારીઓએ જણાવ્યું હતું કે સિંહ અને જનરલ જિયાંગ દ્વિપક્ષીય સંરક્ષણ ઔદ્યોગિક સહયોગને વધારવા માટે વ્યાપક વાટાઘાટો કરશે, જેમાં લશ્કરી સાધનોના સંયુક્ત વિકાસનો સમાવેશ થાય છે.
