અમરેલી જિલ્લામાં છેલ્લા કેટલાક સમયથી માર્ગ અકસ્માતોની હારમાળા અટકવાનું નામ નથી લઈ રહી, જેના કારણે અનેક પરિવારોએ પોતાના વહાલસોયા ગુમાવ્યા છે. આવી જ એક હૃદયદ્રાવક ઘટના ગત તારીખ ૨ના રોજ ધારી-બગસરા હાઈવે પર પ્રેમપરા ગામ પાસે બની હતી, જેમાં એક આશાસ્પદ યુવાનનું કરૂણ મોત નીપજ્યું છે. આ અકસ્માત એટલો ભયાનક હતો કે તેના સીસીટીવી ફૂટેજ જોઈને કોઈપણ વ્યક્તિનું કાળજું કંપાઈ ઉઠે. વિગતો મુજબ, સાપર ગામનો જય કમલેશભાઈ સુદાણી નામનો યુવાન તેના બે મિત્રો સાથે અલ્ટો કારમાં સવાર થઈને નીકળ્યો હતો. કાર અત્યંત પુરપાટ ઝડપે દોડી રહી હતી ત્યારે અચાનક ચાલકે સ્ટીયરિંગ પરથી કાબૂ ગુમાવી દીધો હતો. બેકાબૂ બનેલી કાર રોડની નીચે ઉતરી ગઈ હતી અને હવામાં ફંગોળાઈને એક પછી એક ત્રણ ગોથાં ખાઈ ગઈ હતી. આ ભયાનક પલટીઓ દરમિયાન યુવાન કારની બારીમાંથી બહાર ફેંકાયો હતો અને કમનસીબે કારના ટાયર નીચે જ દબાઈ ગયો હતો. ગંભીર રીતે ઘાયલ થયેલા જયને તાત્કાલિક લોહીલુહાણ હાલતમાં પ્રથમ સ્થાનિક હોસ્પિટલ અને ત્યારબાદ વધુ સારવાર માટે રાજકોટ ખસેડવામાં આવ્યો હતો, પરંતુ કુદરતને કંઈક બીજું જ મંજૂર હતું અને સારવાર દરમિયાન તેનું નિધન થયું હતું. આ કરૂણ સમાચાર મળતા જ સાપર ગામમાં શોકનું મોજું ફરી વળ્યું છે. કહેવાય છે કે આ યુવાન સુરતમાં બોર્ડની પરીક્ષા આપીને વેકેશન માણવા વતન આવ્યો હતો અને મિત્રો સાથે કાર ચલાવવાનું શીખી રહ્યો હતો ત્યારે જ આ કાળમુખો અકસ્માત નડ્યો હતો. જોકે, આ અકસ્માતમાં અન્ય બે મિત્રોનો ચમત્કારિક બચાવ થયો છે, જેઓ કાર ઉભી રહ્યા બાદ સુરક્ષિત રીતે બહાર નીકળી શક્યા હતા. હાલમાં આ મામલે પોલીસ દ્વારા વધુ તપાસ હાથ ધરવામાં આવશે પરંતુ આ ઘટનાએ ફરી એકવાર સ્પીડ અને ડ્રાઈવિંગમાં બેદરકારી સામે લાલબત્તી ધરી છે.
