સુરત શહેરમાં વિદેશમાં નોકરી અપાવવાના નામે મોટી છેતરપિંડીનો મામલો સામે આવ્યો છે. લંડનના વર્ક પરમિટ વિઝા અને વાર્ષિક ૨૭ લાખ રૂપિયાના પગારની લાલચ આપી એક યુવક પાસેથી ૮ લાખ રૂપિયા પડાવનાર આરોપીને અમરોલી પોલીસે વડોદરાથી ઝડપી લીધો છે.
મળતી માહિતી અનુસાર, સુરતના અમરોલી વિસ્તારમાં રહેતા એક યુવકને આરોપી ધર્મેશ નરેશભાઈ ભાટીયાએ વિશ્વાસમાં લીધો હતો. આરોપીએ દાવો કર્યો હતો કે તે યુકેના લંડનમાં આવેલી ‘કેથરીન્સ વેય ન‹સગ’ નામની સંસ્થામાં ઉચ્ચ પગારની નોકરી અપાવી શકે છે.
આરોપીએ ફરિયાદીને વાર્ષિક ૨૭ લાખ રૂપિયાના પેકેજ સાથે લંડનમાં સેટલ કરાવવાની લાલચ આપી હતી. આ આકર્ષક ઓફરથી પ્રભાવિત થઈ ફરિયાદીએ આરોપી પર વિશ્વાસ મૂક્્યો હતો. ત્યારબાદ ધર્મેશે વિઝા પ્રોસેસિંગ, મેડિકલ ચેકઅપ, એમ્બસી એપોઇન્ટમેન્ટ અને અન્ય પ્રક્રિયાના બહાને ફરિયાદી પાસેથી તબક્કાવાર કુલ ૮ લાખ રૂપિયા પડાવી લીધા હતા. સમય પસાર થવા છતાં આરોપીએ ન તો વિઝા આપ્યો અને ન તો નોકરી અંગે કોઈ સ્પષ્ટ માહિતી આપી. ફરિયાદીને શંકા જતાં તેણે પોતાના રૂપિયા પરત માંગ્યા હતા. જાકે આરોપીએ વારંવાર બહાના બનાવ્યા અને અંતે રૂપિયા પરત આપવાનો ઇનકાર કરી દીધો હતો.
પોતાની સાથે છેતરપિંડી થઈ હોવાનો અહેસાસ થતાં ભોગ બનનાર વ્યક્તિએ અમરોલી પોલીસ સ્ટેશનમાં ફરિયાદ નોંધાવી હતી. ફરિયાદના આધારે પોલીસે ગુનો નોંધી ટેક્નિકલ સર્વેલન્સ અને લોકેશન ટ્રેકિંગની મદદથી આરોપી ધર્મેશ ભાટીયાને વડોદરા ખાતેથી ઝડપી પાડ્યો હતો.
