સ્ટેટ ઇમરજન્સી ઓપરેશન સેન્ટર, ગાંધીનગરના અહેવાલ મુજબ ગત ૨૪ કલાક દરમિયાન સમગ્ર રાજ્યમાં ૩૪ જિલ્લાના ૨૨૫ તાલુકાઓમાં હળવાથી ભારે વરસાદ વરસ્યો છે. જે અંતર્ગત છેલ્લાં ૨૪ કલાક દરમિયાન રાજ્યમાં સૌથી વધુ વલસાડ જિલ્લાના વાપી તાલુકામાં ૮ ઇંચથી વધુ વરસાદ નોંધાયો છે. જ્યારે પારડી, ઉમરગામ, સુરતના કામરેજ અને ભાવનગર જિલ્લાના ઘોઘા તાલુકામાં ૬ ઇંચથી વધુ વરસાદ નોંધાયો છે.
ભારે વરસાદને કારણે નર્મદા જિલ્લામાં આવેલ સરદાર સરોવર ડેમમાં પાણીની આવક સતત વધી રહી છે. મધ્યપ્રદેશ અને મહારાષ્ટ્રના ઉપરવાસમાં વરસાદને કારણે હાલ ડેમમાં ૫૦,૬૧૬ ક્યુસેક પાણીની આવક થઈ રહી છે. ડેમની સપાટી વધીને ૧૨૬.૬૪ મીટર સુધી પહોંચી છે અને છેલ્લા ૨૪ કલાકમાં તેમાં નોંધપાત્ર વધારો થયો છે. હાલમાં ડેમ તેની કુલ ક્ષમતાના આશરે ૬૫ ટકા સુધી ભરાયો છે, જ્યારે કેનાલમાં ૭,૪૩૫ ક્્યુસેક પાણી છોડવામાં આવી રહ્યું છે.
ઉપરાંત રાજ્યના અન્ય ૨૦૬ જળાશયો કુલ સંગ્રહ ક્ષમતાના ૪૦.૦૧ ટકા જેટલા ભરાઈ ગયા છે. આમ, સમગ્ર રાજ્યમાં વરસાદના પગલે ૧૧ ડેમ હાઇ એલર્ટ, ૦૪ ડેમ એલર્ટ અને ૦૭ ડેમ માટે વો‹નગ આપવામાં આવી છે.
ભાવનગર જિલ્લાના પાલીતાણા ખાતે આવેલ શેત્રુંજી ડેમમાં પણ પાણીની આવક વધતા વહેલી સવારે ૫૯ દરવાજા ખોલવામાં આવ્યા છે. હાલમાં ડેમમાં ૯,૪૪૦ ક્યુસેક પાણીની આવક નોંધાઈ રહી છે અને પાણીનો નિયંત્રિત આઉટફ્લો શરૂ કરવામાં આવ્યો છે.
દક્ષિણ ગુજરાતના વલસાડ જિલ્લામાં ધોધમાર વરસાદને કારણે મધુબન ડેમના ઉપરવાસમાંથી ૬૮ હજાર ક્યુસેક પાણીની આવક નોંધાઈ છે. સીઝનમાં પ્રથમ વખત ડેમના છ દરવાજા ખોલવામાં આવ્યાં છે. અને ડેમમાંથી ૩૨ હજાર ક્યુસેક પાણી દમણગંગા નદીમાં છોડવામાં આવ્યું છે.
બીજી તરફ બોટાદ જિલ્લાના પાટણા ગામ નજીક કાળુભાર નદીમાં પણ સીઝનના પ્રથમ વરસાદ બાદ નવા નીર આવ્યા છે. ઉપરવાસમાં સારા વરસાદના કારણે નદી બે કાંઠે વહેતી થઈ છે, જેને લઈને ખેડૂતોમાં ખુશીની લાગણી જોવા મળી રહી છે.
હવામાન વિભાગે આગામી દિવસોમાં પણ રાજ્યના અનેક વિસ્તારોમાં ભારે વરસાદની શક્યતા વ્યક્ત કરી છે. વહીવટી તંત્રે નદી કિનારાના વિસ્તારોમાં રહેતા લોકોને સતર્ક રહેવા અને જરૂરી સાવચેતી રાખવા અપીલ કરી છે.
