શાસ્ત્રોમાં પિતૃ તર્પણનું અનેરું મહત્વ છે, પરંતુ કુકાવાવ-વડિયા તાલુકાના બાંભણીયા ગામના સરપંચ શ્રી લાલજીભાઈ ભુવાએ સામાજિક જવાબદારી અને પ્રકૃતિ પ્રત્યેની કૃતજ્ઞતાનું ઉત્તમ ઉદાહરણ પૂરું પાડ્યું છે. ગીરગંગા પરિવાર ટ્રસ્ટના અભિયાનથી પ્રેરાઈને તેમણે માતૃશ્રીના અવસાન બાદ પરંપરાગત વિધિઓની સાથે પ્રકૃતિના સંરક્ષણ દ્વારા માતૃ તર્પણનો સંકલ્પ સિદ્ધ કર્યો છે. ‘પાણીઢોળ’ની પાવન વિધિએ તેમણે વિચાર્યું કે પ્રકૃતિનું ઋણ કેવી રીતે અદા કરી શકાય, જેના પરિણામે તેમણે ગામમાં વ્યર્થ વહી જતા વરસાદી પાણીને રોકવા ચેકડેમ બનાવવાનું ભગીરથ કાર્ય હાથ ધર્યું. ગીરગંગા ટ્રસ્ટ મુજબ, જેમ રાજા સગરે પિતૃઓના તર્પણ માટે પૃથ્વી પર ગંગાનું અવતરણ કરાવી વેરાન પ્રદેશને હરિયાળો બનાવ્યો હતો, તેવી જ રીતે લાલજીભાઈએ આધુનિક યુગમાં સૂકી ધરાને જળથી સમૃદ્ધ કરી નવી રાહ ચીંધી છે.
