પાકિસ્તાન ક્રિકેટ ટીમમાં ચાલી રહેલ વિવાદ હવે તપાસ એજન્સી સુધી પહોંચ્યો છે. પાકિસ્તાન ક્રિકેટ બોર્ડની ફરિયાદ પર કાર્યવાહી કરતા, નેશનલ સાયબર ક્રાઇમ ઇન્વેસ્ટિગેશન એજન્સીએ ડ્રેસિંગ રૂમની માહિતી લીક થવાના કથિત સંદર્ભમાં અનુભવી ખેલાડીઓ મોહમ્મદ રિઝવાન અને ઇમામ-ઉલ-હકની લગભગ ચાર કલાક સુધી પૂછપરછ કરી. આ ઘટનાક્રમ પાકિસ્તાન ટીમના ઇંગ્લેન્ડના ચાલી રહેલા ટેસ્ટ પ્રવાસમાં નબળા પ્રદર્શન અને તેની આસપાસના શિસ્તભંગના વિવાદો વચ્ચે આવ્યો છે. શિસ્તભંગના મુદ્દાઓને કારણે રિઝવાન અને ઇમામ સહિત સાત ખેલાડીઓ અને સપોર્ટ સ્ટાફના બે સભ્યોને ઇંગ્લેન્ડ પ્રવાસમાંથી પાછા મોકલી દેવામાં આવ્યા છે.
બંને ખેલાડીઓ હાલમાં આ મામલે તપાસ હેઠળ છે. પરિણામે, તેઓ શનિવારથી શરૂ થનારી પાકિસ્તાનની પ્રીમિયર ડોમેસ્ટિક ફર્સ્ટ-ક્લાસ ટુર્નામેન્ટમાં ભાગ લઈ શકશે નહીં. તપાસની ગંભીરતાનો અંદાજ એ હકીકત પરથી લગાવી શકાય છે કે પાકિસ્તાન ટીમના સુરક્ષા મેનેજરે રિઝવાન અને ઇમામના મોબાઇલ ફોન એનસીસીઆઇએને સોંપી દીધા છે. એક સૂત્રના જણાવ્યા અનુસાર, બંને ખેલાડીઓએ તેમના મોબાઇલ ઉપકરણોની ફોરેન્સિક તપાસની મંજૂરી આપવા માટે પણ સંમતિ આપી છે. સૂત્રએ જણાવ્યું હતું કે, “તપાસનું મુખ્ય કેન્દ્ર ઈંગ્લેન્ડ શ્રેણી દરમિયાન ડ્રેસિંગ રૂમમાંથી માહિતી લીક થવાનો આરોપ હશે.”
રિઝવાન અને ઇમામની પૂછપરછ દરમિયાન, તેમને કેસ સંબંધિત પ્રશ્નોના જવાબ આપવા માટે કહેવામાં આવ્યું હતું. બંને ખેલાડીઓએ એનસીસીઆઇએના પ્રશ્નોના લેખિત જવાબો સબમિટ કરવા માટે વધુ સમય માંગ્યો છે. પાકિસ્તાન ક્રિકેટ બોર્ડના પ્રવક્તાએ પણ પુષ્ટિ આપી હતી કે એનસીસીઆઇએ ડ્રેસિંગ રૂમમાંથી માહિતી લીક થવાના આરોપની તપાસ કરી રહ્યું છે. જા કે, તેમણે સ્પષ્ટતા કરી હતી કે તપાસ ચાલુ છે અને હાલમાં આ બાબતે કોઈ વધુ ટિપ્પણી કરવામાં આવશે નહીં.પીસીબીએ અગાઉ જણાવ્યું હતું કે શિસ્ત અને આચરણ અંગે મીડિયા અહેવાલો બાદ તેણે આંતરિક શિસ્ત તપાસ શરૂ કરી છે. બોર્ડે જણાવ્યું હતું કે, “શિસ્ત અને આચરણ અંગે મીડિયા અહેવાલો બાદ આંતરિક શિસ્ત તપાસ શરૂ કરવામાં આવી છે, જેની હાલમાં આંતરિક સમીક્ષા કરવામાં આવી રહી છે.”
આ કેસ અસામાન્ય માનવામાં આવે છે કારણ કે પાકિસ્તાન ક્રિકેટ બોર્ડે રાષ્ટ્રીય ટીમના ખેલાડીઓ વિરુદ્ધ સાયબર ક્રાઇમ તપાસ એજન્સી પાસે ફરિયાદ નોંધાવી છે.સીબીઆઇના ચેરમેન મોહસીન નકવી પણ પાકિસ્તાનના ગૃહમંત્રી છે, અને એનસીસીઆઇએ તેમના મંત્રાલય હેઠળ કાર્ય કરે છે. આ સંદર્ભમાં, રિઝવાન અને ઇમામની પૂછપરછથી પાકિસ્તાન ક્રિકેટમાં ચાલી રહેલા વિવાદમાં વધુ વધારો થયો છે. બંને ખેલાડીઓ હાલમાં તપાસ હેઠળ છે, અને એનસીસીઆઇએ તપાસ પૂર્ણ થયા પછી જ સ્પષ્ટ થશે કે ડ્રેસિંગ રૂમની માહિતી લીક થવાના કથિત મામલામાં આગળ શું કાર્યવાહી કરવામાં આવશે.
