ગુજરાતમાં થોડા દિવસના વિરામ બાદ વરસાદનો નવો રાઉન્ડ શરૂ થયો છે. અષાઢી બીજના દિવસે મેઘરાજાએ રાજ્યના અનેક વિસ્તારોમાં અમીછાંટણા કર્યા હતા. જોકે, કેટલાક વિસ્તારોમાં સારો એવો વરસાદ પણ નોંધાયો હતો. વરસાદની નવી સિસ્ટમ સક્રિય થતાં ખેડૂતોમાં ફરી ઉત્સાહની લાગણી પ્રસરી છે અને ખેતી માટે અનુકૂળ વાતાવરણ બન્યું છે. વરસાદના કારણે ગરમીમાંથી પણ લોકોને રાહત મળી છે અને રાજ્યના અનેક વિસ્તારોમાં વાદળછાયું વાતાવરણ જાવા મળી રહ્યું છે.
છેલ્લા ૨૪ કલાક દરમિયાન ગુજરાતના કુલ ૧૧૨ તાલુકામાં મધ્યમથી ભારે વરસાદ નોંધાયો છે. સૌથી વધુ વરસાદ રાજકોટ જિલ્લાના પડધરીમાં ૨.૨૪ ઈંચ નોંધાયો હતો. ત્યારબાદ સુરત જિલ્લાના કામરેજમાં ૧.૮૧ ઈંચ, કચ્છના રાપરમાં ૧.૬૯ ઈંચ, જૂનાગઢ જિલ્લાના માંગરોળમાં ૧.૫૦ ઈંચ અને સુરત જિલ્લાના બારડોલીમાં ૧.૫૦ ઈંચ વરસાદ નોંધાયો હતો. ઉપરાંત ભાવનગરના વલ્લભીપુરમાં ૧.૨૨ ઈંચ, અમદાવાદ જિલ્લાના ધંધૂકામાં ૧.૧૮ ઈંચ, મોરબી જિલ્લાના ટંકારામાં ૧.૧૪ ઈંચ, ભરૂચ જિલ્લાના નેત્રંગમાં ૧ ઈંચ અને સુરત જિલ્લાના અરેઠમાં ૧ ઈંચ વરસાદ નોંધાયો હતો.
રાજ્યના અન્ય વિસ્તારોમાં પણ સારો વરસાદ નોંધાયો છે. બરવાળામાં ૨૧ મીમી, ધોલેરામાં ૧૮ મીમી, ચોટિલામાં ૧૮ મીમી, સાણંદમાં ૧૭ મીમી અને દસાડામાં ૧૭ મીમી વરસાદ નોંધાયો હતો. વરસાદના કારણે ખેડૂતોમાં ખુશીનો માહોલ જાવા મળી રહ્યો છે. ખાસ કરીને વાવણી બાદ વરસાદ મળતા પાકને ફાયદો થશે તેવી આશા વ્યક્ત કરવામાં આવી રહી છે.
બીજી તરફ, ભારતીય હવામાન વિભાગે દેશના અનેક રાજ્યો માટે ભારે વરસાદ અને વાવાઝોડાની ચેતવણી જાહેર કરી છે. હવામાન વિભાગની આગાહી મુજબ આજે ૧૭ જુલાઈના રોજ ઉત્તર પ્રદેશ, બિહાર, દિલ્હી, રાજસ્થાન, ઉત્તરાખંડ, હિમાચલ પ્રદેશ, પંજાબ, જમ્મુ અને કાશ્મીર, ઝારખંડ, પશ્ચિમ બંગાળ, મધ્ય પ્રદેશ અને છત્તીસગઢ સહિતના રાજ્યોમાં ભારે વરસાદની શક્યતા છે. આ વિસ્તારોમાં કેટલાક સ્થળોએ વાવાઝોડા અને વીજળી પડવાની પણ સંભાવના વ્યક્ત કરવામાં આવી છે.
હવામાન વિભાગે વરસાદની આગાહીને ધ્યાનમાં રાખીને લોકોને સાવચેત રહેવાની સલાહ આપી છે. ગુજરાતમાં વરસાદનો નવો રાઉન્ડ શરૂ થતાં આગામી દિવસોમાં પણ રાજ્યના વિવિધ વિસ્તારોમાં વરસાદી માહોલ યથાવત રહે તેવી શકયતા છે. બીજી તરફ દેશના ૧૨ રાજ્યોમાં ભારે વરસાદ અને વાવાઝોડાની આગાહીને લઈને સ્થાનિક તંત્રને પણ સતર્ક રહેવા સૂચના આપવામાં આવી છે. ખેડૂતો માટે હાલનો વરસાદ રાહતરૂપ બન્યો છે અને ચોમાસાની ગતિવિધિ વધુ સક્રિય બનતા કૃષિ ક્ષેત્રને તેનો લાભ મળવાની આશા વ્યક્ત કરવામાં આવી રહી છે.
