ઉમરેઠ વિધાનસભા બેઠકની પેટાચૂંટણી માટે આજે શાંતિપૂર્ણ માહોલમાં સરેરાશ ૫૫ ટકા મતદાન નોંધાયું છે. ભાજપના હર્ષદ પરમાર અને કોંગ્રેસના ભૃગુરાજસિંહ ચૌહાણ સહિત ૬ ઉમેદવારોનું ભાવી ઈવીએમમાં સીલ થયું છે. અસહ્ય ગરમી વચ્ચે વહીવટી તંત્ર દ્વારા પીવાના પાણી અને શેડ જેવી સુવિધાઓ ઉભી કરવામાં આવી હતી. કલેક્ટર પ્રવીણ ચૌધરી અને એસપી ગૌરવ જસાણીના નેતૃત્વમાં ચુસ્ત પોલીસ બંદોબસ્ત અને વેબકાસ્ટિંગ દ્વારા પ્રક્રિયા પર સતત નજર રાખવામાં આવી હતી. હવે સૌની નજર પરિણામો પર ટકેલી છે.
