ઓડિશામાં તીવ્ર ગરમીના મોજાને ધ્યાનમાં રાખીને, સરકારે શુક્રવારે વિદ્યાર્થીઓ માટે ઉનાળાની રજાઓ વહેલા શરૂ કરવાની જાહેરાત કરી અને ૨૭ એપ્રિલથી રાજ્યની તમામ શાળાઓ બંધ કરવાની જાહેરાત કરી. મુખ્યમંત્રી કાર્યાલયે જણાવ્યું હતું કે, વિદ્યાર્થીઓની સલામતી અને સુખાકારીને ધ્યાનમાં રાખીને, મુખ્યમંત્રી મોહન ચરણ માઝીએ શાળા અને માસ શિક્ષણ વિભાગ દ્વારા ઉનાળાની રજાઓ વહેલા શરૂ કરવાના પ્રસ્તાવને મંજૂરી આપી છે.
મુખ્યમંત્રી કાર્યાલયે જણાવ્યું હતું કે ૨૭ એપ્રિલથી તમામ સરકારી અને ખાનગી શૈક્ષણિક સંસ્થાઓ બંધ રહેશે. ઘણા જિલ્લાઓમાં તાપમાનમાં નોંધપાત્ર વધારાને ધ્યાનમાં રાખીને, સરકારે વિદ્યાર્થીઓની સલામતી અને સુખાકારીને પ્રાથમિકતા આપવા માટે આ પગલું ભર્યું છે.
ઓડિશા સરકાર દ્વારા જારી કરાયેલા આદેશમાં જણાવાયું હતું કે રાજ્યની તમામ સરકારી, સરકારી સહાયિત અને ખાનગી શાળાઓ ૨૭ એપ્રિલથી ઉનાળાના વેકેશન માટે બંધ રહેશે. જાકે, અગાઉ નિર્ધારિત પરીક્ષાઓ, વસ્તી ગણતરી કાર્ય અને અન્ય સત્તાવાર કાર્ય રાબેતા મુજબ ચાલુ રહેશે.
અધિકારીઓએ જણાવ્યું હતું કે રાજ્યમાં વિદ્યાર્થીઓ માટે ઉનાળાની રજાઓ સામાન્ય રીતે મેના પહેલા અઠવાડિયા પછી શરૂ થાય છે. પરંતુ ઉનાળાની રજાઓ આગળ વધારવાનો પ્રસ્તાવ એટલા માટે મૂકવામાં આવ્યો હતો કારણ કે તાજેતરના દિવસોમાં ઘણા જિલ્લાઓમાં તાપમાન ૪૦ ડિગ્રી સેલ્સયસથી ઉપર વધી ગયું છે. મહેસૂલ અને આપત્તિ વ્યવસ્થાપન મંત્રી સુરેશ ચંદ્ર પૂજારીએ એમ પણ જણાવ્યું હતું કે વધતા તાપમાનને ધ્યાનમાં રાખીને, આંગણવાડી કેન્દ્રો પણ ટૂંક સમયમાં બંધ કરવામાં આવશે અને બાળકોને ઘરે ઘરે રાશન પહોંચાડવાની વ્યવસ્થા કરવામાં આવશે.
ઓડિશામાં ઓછામાં ઓછા ૨૪ કેન્દ્રોમાં ૪૦ ડિગ્રી સેલ્સયસ કે તેથી વધુ તાપમાન નોંધાયું હતું. હવામાન વિભાગે આગાહી કરી છે કે આગામી દિવસોમાં ગરમી ચરમસીમાએ પહોંચશે તેમ, રાજ્યના કેટલાક ભાગોમાં દિવસનું તાપમાન ૪૫ ડિગ્રી સેલ્સયસની આસપાસ વધી શકે છે.
