ખેડા જિલ્લામાં સાર્વત્રિક વરસાદ વચ્ચે વસો તાલુકામાં મેઘરાજાએ રૌદ્ર સ્વરૂપ ધારણ કર્યું છે. આકાશી આફત જેવા વરસેલા ભારે વરસાદને કારણે વસો ગામમાં ચારેકોર જળબંબાકારની સ્થિતિ સર્જાઈ છે. વસોમાં રેકોર્ડબ્રેક ૧૭ ઈંચ જેટલો ભારે વરસાદ ખાબકતાં સમગ્ર ગામ અને ખાસ કરીને મુખ્ય બજાર પાણીમાં ગરકાવ થઈ ગયું છે.સ્થાનિક રહીશો અને વેપારીઓના જણાવ્યા અનુસાર, વસોના ગામના મુખ્ય બજારમાં ૨૦ વર્ષ પછી આટલી મોટી માત્રામાં વરસાદી પાણી ભરાયા છે. બજારના રસ્તાઓ પર કમર સમા પાણી વહી રહ્યા છે, જેના કારણે વાહનવ્યવહાર અને જનજીવન સંપૂર્ણપણે ઠપ થઈ ગયું છે. ૨૦ વર્ષ બાદ સર્જાયેલી આવી પરિસ્થિતિથી સ્થાનિકોમાં ભય અને ચિંતાનો માહોલ જાવા મળી રહ્યો છે.
બજારમાં કમર સમા પાણી ભરાઈ જવાને કારણે વેપારીઓની દુકાનોમાં પાણી ઘૂસી ગયા હતા. દુકાનોમાં રાખેલો કિંમતી કરિયાણા, કાપડ અને અન્ય વેચાણનો માલોસામાન પાણીમાં પલળી જતાં વેપારીઓને લાખો રૂપિયાનું નુકસાન વેઠવાનો વારો આવ્યો છે. પાણીના નિકાલની યોગ્ય વ્યવસ્થા ન હોવાથી વેપારીઓ ભારે મુશ્કેલીમાં મુકાયા છે અને વેપાર-ધંધા ઠપ થઈ ગયા છે.આટલી વિકટ પરિસ્થિતિ અને કુદરતી આપદા વચ્ચે પણ વહીવટી તંત્ર દ્વારા કોઈ યોગ્ય કામગીરી કે સ્થળ મુલાકાત ન લેવાતાં લોકોમાં ભારે આક્રોશ જાવા મળી રહ્યો છે. ગામલોકોનું કહેવું છે કે, આટલો ભારે વરસાદ પડ્યો અને બજારમાં કમર સુધીના પાણી ભરાઈ ગયા હોવા છતાં, તંત્રનો કોઈ પણ જવાબદાર અધિકારી કે પ્રતિનિધિ પરિસ્થિતિની સમીક્ષા કરવા કે સહાય પહોંચાડવા આવ્યો નથી. વહીવટી તંત્રની આવી ઘોર બેદરકારી અને નિષ્ક્રયતા સામે વસોના ગ્રામજનો અને વેપારીઓમાં ભારે રોષ વ્યાપી ગયો છે. હાલમાં વસોના ગ્રામજનો તાત્કાલિક ધોરણે બજારમાંથી પાણીના નિકાલની વ્યવસ્થા કરવામાં આવે અને નુકસાનીનો સર્વે કરી યોગ્ય વળતર આપવામાં આવે તેવી માંગ કરી રહ્યા છે.





































