વડોદરા શહેરની માંજલપુર વિધાનસભા બેઠકના વરિષ્ઠ ધારાસભ્ય અને ભાજપના લોકપ્રિય નેતા યોગેશ પટેલના તાજેતરમાં થયેલા નિધન બાદ હવે તેમના રાજકીય ઉત્તરાધિકારી કોણ બનશે તે મુદ્દે ચર્ચાઓએ જોર પકડ્યું છે. યોગેશ પટેલના નિધન બાદ યોજાયેલી પ્રાર્થના સભામાં મુખ્યમંત્રી ભૂપેન્દ્ર પટેલ સહિત ભાજપના અનેક અગ્રણીઓ ઉપસ્થિત રહ્યા હતા. આ દરમિયાન રાજકીય વર્તુળોમાં આગામી ઉમેદવારને લઈને ચર્ચાઓ શરૂ થઈ ગઈ છે.
માંજલપુર બેઠક પર સતત આઠ વખત વિજય મેળવનાર યોગેશ પટેલે વિસ્તારના વિકાસમાં મહત્વપૂર્ણ યોગદાન આપ્યું હતું. તેમના નિધનથી ભાજપ માટે આ બેઠક પર નવા નેતૃત્વની પસંદગી એક મહત્વપૂર્ણ પડકાર બની છે.
રાજકીય ચર્ચાઓમાં હાલ ભાજપના વર્તમાન શહેર પ્રમુખ ડો. જયપ્રકાશ સોની નું નામ સૌથી વધુ ચર્ચામાં છે. સંગઠનમાં તેમની સક્રિય ભૂમિકા અને લાંબા સમયથી પક્ષ સાથેની સંકળાયેલતા તેમને પ્રબળ દાવેદાર બનાવે છે. આ ઉપરાંત પૂર્વ શહેર પ્રમુખ ડો. વિજય શાહનું નામ પણ સંભવિત ઉમેદવારોમાં ગણવામાં આવી રહ્યું છે.
બીજી તરફ, વડોદરાના પૂર્વ મેયર નિલેશ રાઠોડ પણ ચર્ચામાં છે. તેઓ યોગેશ પટેલના નજીકના સહયોગી તરીકે ઓળખાતા હતા. પૂર્વ કોર્પોરેટર ઘનશ્યામ પટેલનું નામ પણ સંભવિત ઉમેદવારોમાં લેવામાં આવી રહ્યું છે. રાજકીય નિરીક્ષકો માને છે કે સંગઠન અને સ્થાનિક લોકપ્રિયતા બંને બાબતોને ધ્યાનમાં રાખીને ભાજપ આગામી નિર્ણય લઈ શકે છે.
ઉલ્લેખનીય છે કે ૨૦૨૨ની વિધાનસભા ચૂંટણી દરમિયાન પણ માંજલપુર બેઠક માટે ઉમેદવારની પસંદગી અંતિમ ક્ષણે કરવામાં આવી હતી. ત્યારે અનેક નવા નામોની ચર્ચા વચ્ચે ભાજપે ફરી એક વખત યોગેશ પટેલ પર વિશ્વાસ વ્યક્ત કરીને તેમને ઉમેદવાર જાહેર કર્યા હતા. તે સમયે પૂર્વ સ્થાયી સમિતિ ચેરમેન ડો. હિતેન્દ્ર પટેલ, કે.પી. પટેલ અને હિમાંશુ પટેલ જેવા નામો પણ ચર્ચામાં હતા.
હાલ ભાજપ તરફથી કોઈ સત્તાવાર જાહેરાત કરવામાં આવી નથી. જોકે, આગામી પેટાચૂંટણીને ધ્યાનમાં રાખીને સંગઠન સ્તરે મનોમંથન શરૂ થઈ ગયું હોવાનું રાજકીય સૂત્રો જણાવી રહ્યા છે. હવે પક્ષ કોના નામ પર મહોર મારે છે તેના પર સમગ્ર શહેરની નજર મંડાઈ છે.
