ગુજરાત સરકાર દ્વારા પ્રજાભિમુખ વહીવટના સંકલ્પને સાકાર કરવા માટે અમલમાં મૂકાયેલો સેવા સેતુ કાર્યક્રમ આજે ગ્રામીણ જનતા માટે આશીર્વાદરૂપ સાબિત થઈ રહ્યો છે. તાજેતરમાં અમરેલી જિલ્લાના વિવિધ તાલુકાઓમાં સેવા સેતુ ૨.૦ અંતર્ગત ભવ્ય કાર્યક્રમોનું આયોજન કરવામાં આવ્યું હતું. રાજુલાના દાતરડી, જાફરાબાદના મીતીયાળા, સાવરકુંડલાના આદસંગ, લીલીયાના સલડી મુકામે આ કાર્યક્રમો યોજાયા હતા. આ કાર્યક્રમનો મુખ્ય ઉદ્દેશ્ય સામાન્ય નાગરિકોને સરકારી કચેરીઓના ધક્કા ખાધા વિના પોતાના જ ગામમાં તમામ પાયાની સેવાઓ ઉપલબ્ધ કરાવવાનો રહયો છે. રાજ્ય સરકારની આ પારદર્શક અને ગતિશીલ કાર્યપદ્ધતિને કારણે ગ્રામ્ય વિસ્તારોમાં વહીવટી પ્રક્રિયાઓ અત્યંત સરળ બની છે. સેવા સેતુ કાર્યક્રમના કેન્દ્રસ્થાને નાગરિકોને રોજબરોજની જરૂરિયાત મુજબના દાખલાઓ આપવાની પ્રક્રિયા રહી છે. અમરેલી જિલ્લાના આ પાંચેય સ્થળો પર યોજાયેલા કાર્યક્રમો દરમિયાન હજારો ગ્રામ્ય નાગરિકોએ પોતાની જરૂરિયાત મુજબની સેવાઓનો લાભ લીધો હતો. આ દરમિયાન જાતિના દાખલા, આવકના દાખલા અને ગામ નમુના નંબર-૨ જેવી અતિ મહત્વની વહીવટી સેવાઓ સ્થળ પર જ પુરી પાડવામાં આવી હતી. આ ઉપરાંત મિલકત અને રહેઠાણના પુરાવા તરીકે ઉપયોગી એવા આકારણીના દાખલા અને નવા લગ્ન કરનાર યુગલો માટે લગ્ન નોંધણીની કામગીરી પણ ત્વરિત ગતિએ પૂર્ણ કરવામાં આવી હતી. ગ્રામીણ રોજગારી માટેના પાયાના એકમ સમાન નવા જોબ કાર્ડ પણ અનેક લાભાર્થીઓને એનાયત કરવામાં આવ્યા હતા.
