કુંકાવાવ મોટી, વડીયા, પીપળલગ અને ચિત્તલ સહિતના ગ્રામ્ય વિસ્તારોમાં
અમરેલી જિલ્લામાં તારીખ ૫ જૂનથી ૨૧ જૂન, ૨૦૨૬ દરમિયાન લોકભાગીદારી અને જિલ્લા વહીવટીતંત્રના સંયુક્ત ઉપક્રમે વિવિધ જનકલ્યાણકારી કાર્યક્રમોની એક ભવ્ય હારમાળાનું આયોજન કરવામાં આવ્યું છે. આ વિશેષ કાર્યક્રમોના માધ્યમથી વિકાસ અને સુશાસનની ગાથા છેવાડાના લોકો સુધી પહોંચાડવાની સાથે-સાથે વિવિધ સરકારી કલ્યાણકારી યોજનાઓ અંગે વ્યાપક જનજાગૃતિ લાવવાનો સરાહનીય પ્રયાસ કરવામાં આવશે. આ મહત્વપૂર્ણ કડીના એક ભાગરૂપે સમગ્ર રાજ્યની સાથે અમરેલીમાં પણ વિશ્વ પર્યાવરણ દિવસની ઉત્સાહભેર ઉજવણી હાથ ધરવામાં આવી છે. આ અંતર્ગત અમરેલી શહેર સહિતના વિવિધ ગ્રામ્ય વિસ્તારોમાં ‘એક પેડ માં કે નામ ૩.૦’ અભિયાન હેઠળ સ્થાનિક ગ્રામ પંચાયતો અને સદ્દભાવના ટ્રસ્ટના સહિયારા પ્રયાસો થકી વ્યાપક સ્તરે વૃક્ષારોપણના કાર્યક્રમો સંપન્ન થયા હતા. ઊર્જા રાજ્યમંત્રી કૌશિકભાઈ વેકરીયાએ સણોસરા, મોટા માંડવડા, કુંકાવાવ મોટી, વડીયા, પીપળલગ અને ચિત્તલ સહિતના ગ્રામ્ય વિસ્તારોની રૂબરૂ મુલાકાત લઈને પર્યાવરણની સુરક્ષા કાજે વૃક્ષારોપણ કરીને ‘એક પેડ માં કે નામ ૩.૦’ અભિયાનનો ગરિમાપૂર્ણ પ્રારંભ કરાવ્યો હતો. તેમણે પર્યાવરણ પ્રત્યે સામાન્ય જનતામાં જાગૃતિ વધે તે હેતુથી એક પ્રેરણાદાયી સંદેશ આપતા જણાવ્યું હતું કે, દરેક પરિવારે પરિવારદીઠ ઓછામાં ઓછા પાંચ વૃક્ષોનું વાવેતર કરવું જોઈએ અને માત્ર વાવેતર જ નહીં પરંતુ તેનું યોગ્ય જતન કરીને ઉછેર કરવાની જવાબદારી પણ નિભાવવી જોઈએ. રાજ્યમંત્રીએ સણોસરા મુકામે વૃક્ષારોપણ કરવાની સાથે-સાથે ગ્રામીણ વિસ્તારના વિવિધ વિકાસકામોનું ખાતમુહૂર્ત પણ કર્યું હતું. આ વિસ્તારમાં અંદાજે રૂપિયા ૩૦ લાખથી વધુના ખર્ચે વિવિધ જનસુવિધાના કામો હાથ ધરવામાં આવશે, જેનાથી સ્થાનિક નાગરિકોની સુખ-સુવિધાઓમાં નોંધપાત્ર વધારો થશે. મંત્રી કૌશિકભાઈ વેકરીયાએ કુંકાવાવ મોટી ખાતે આયોજિત કાર્યક્રમમાં જાહેરાત કરી હતી કે સમગ્ર અમરેલી વિધાનસભા વિસ્તારમાં ૫૧ હજાર વૃક્ષોનું વાવેતર કરીને હરિયાળું અમરેલી બનાવવાનું લક્ષ્યાંક નક્કી કરવામાં આવ્યું છે. આ અંતર્ગત પસંદ કરાયેલા ૨૫ ગામોમાં ગામદીઠ ૨-૨ હજાર વૃક્ષો અને અમરેલી શહેરમાં ૧ હજાર વૃક્ષો વાવવામાં આવશે. પૃથ્વી અને પ્રકૃતિના રક્ષણ માટે યોજાયેલા આ કાર્યક્રમમાં જિલ્લા અને તાલુકા પંચાયતના હોદ્દેદારો, સરપંચો તેમજ સ્થાનિક નાગરિકો મોટી સંખ્યામાં ઉપસ્થિત રહ્યા હતા.
