સૌરાષ્ટ્રની સુકી ધરા માટે આશીર્વાદ સમાન ગણાતી ‘સૌની યોજના’એ ખરા અર્થમાં પ્રદેશની જીવાદોરી સાબિત થઈ રહી છે. તાજેતરમાં અમરેલી જિલ્લાના મોણપુર ગામમાં નર્મદાના નીરનું ભવ્ય આગમન થયું છે, જે સમગ્ર પંથક માટે હર્ષ અને ઉલ્લાસનો વિષય બન્યો છે. આ ઐતિહાસિક ક્ષણના સાક્ષી બનતા જિલ્લા પ્રભારી મંત્રી જીતુ વાઘાણી અને ઊર્જા રાજ્યમંત્રી કૌશિક વેકરિયાએ મોણપુર ખાતે ‘સૌની યોજના’ લિંક ૪, પેકેજ ૫ અંતર્ગત તૈયાર કરાયેલા સ્કાવર વાલ્વનું વિધિવત લોકાર્પણ કર્યું હતું. આ વાલ્વના નિર્માણ પાછળ અંદાજે રૂ. ૨૭.૮૪ લાખનો ખર્ચ કરવામાં આવ્યો છે. આ સુવિધાને પરિણામે આશરે ૩૫૦ કિલોમીટર જેટલા લાંબા અંતરેથી નર્મદા મૈયાના પાણી હવે સીધા જ મોણપુરના સ્થાનિક તળાવમાં ઠલવાશે, જે આ વિસ્તારના જળસ્તરને ઊંચા લાવવામાં પાયાની ભૂમિકા ભજવશે. લોકાર્પણ સમારોહ દરમિયાન કેબિનેટ મંત્રી જીતુ વાઘાણીએ જણાવ્યું હતું કે, આ માત્ર એક લોખંડી વાલ્વ નથી, પરંતુ તે આસપાસના ૮ થી ૧૦ ગામોની ખેતી, પીવાનું પાણી અને અબોલ પશુ-પંખીઓ માટે જીવન આપતો ‘પ્રાણવાયુ’ સમાન સ્ત્રોત છે. વડાપ્રધાન નરેન્દ્ર મોદીની દીર્ઘદ્રષ્ટિ અને ઈચ્છાશક્તિને કારણે જ આજે સૌરાષ્ટ્ર અને કચ્છ જેવા પાણીની તીવ્ર અછત ધરાવતા વિસ્તારોમાં પાણીની સમસ્યાનો કાયમી ઉકેલ શક્ય બન્યો છે. ખાસ કરીને ઊર્જા મંત્રી કૌશિક વેકરિયાની જહેમતથી આ સ્પેશિયલ કેસમાં મંજૂર થયેલો વાલ્વ હવે આગામી વર્ષો સુધી ચેકડેમોને ભરેલા રાખશે અને ભૂગર્ભ જળના તળ જાળવી રાખવામાં મદદ કરશે. આ માત્ર સિંચાઈની સગવડ નથી, પરંતુ ગ્રામીણ અર્થતંત્રને મજબૂત બનાવવાનું એક પગલું છે.મોણપુર બાદ વિકાસનો આ રથ ચિત્તલ ગામ સુધી પહોંચ્યો હતો, જ્યાં ‘જલ જીવન મિશન’ હેઠળ મહ¥વના કાર્યોનું લોકાર્પણ કરાયું હતું. અંદાજે રૂ. ૨.૩૩ કરોડના ખર્ચે સાકાર થયેલી ‘નલ સે જલ’ યોજનાને કારણે ચિત્તલના ૨૧૮ જેટલા પરિવારોને હવે ઘરઆંગણે જ શુદ્ધ પીવાનું પાણી ઉપલબ્ધ થશે. આ ઉપરાંત, સ્થાનિક વિકાસને વેગ આપવા માટે રૂ. ૪૮ લાખના ખર્ચે વિવિધ જનસુખાકારીના કામો જેવા કે સ્લેબડ્રેઈન, પૂર સંરક્ષણ દિવાલ, કોમ્યુનિટી હોલ અને સીસી રોડના કામોનું ખાતમુહૂર્ત પણ કરવામાં આવ્યું હતું. આ પ્રસંગે સાંસદ ભરત સુતરીયા, કલેકટર વિકલ્પ ભારદ્વાજ અને અન્ય વહીવટી અધિકારીઓની ઉપસ્થિતિએ સરકારની વિકાસ પ્રત્યેની પ્રતિબદ્ધતા દર્શાવી હતી. સમગ્રતયા, નર્મદાના નીર અને માળખાગત સુવિધાઓના સમન્વયથી અમરેલી જિલ્લો સમૃદ્ધિના પંથે આગળ વધી રહ્યો છે.
