સુરત ભાજપમાં ફરી એકવાર આંતરિક વિખવાદ સામે આવ્યો છે. ગેરકાયદે બાંધકામના મામલે ૧૯ લાખ રૂપિયાના કથિત સેટલમેન્ટની વોટ્‌સએપ ચેટ વાઈરલ થતાં શહેરના રાજકીય વર્તુળોમાં ચર્ચા શરૂ થઈ છે. આ ચેટમાં નાણાંની વહેંચણીથી લઈને કોર્પોરેટરો અને ધારાસભ્યના નામે રૂપિયા લેવાયા હોવાની વાતો સામે આવી છે. જાકે, આ સમગ્ર મામલે હજુ સુધી કોઈ સત્તાવાર પુષ્ટિ થઈ નથી અને તમામ વિગતો તપાસનો વિષય છે.
મળતી માહિતી મુજબ, સુરતની એક ખાનગી સોસાયટીમાં ગેરકાયદે બાંધકામના મામલે ૧૯ લાખ રૂપિયાના કથિત સેટલમેન્ટની ચર્ચા થઈ રહી છે. વાઈરલ થયેલી ચેટમાં વોર્ડ નંબર ૨૭ના દરેક કોર્પોરેટરને બે-બે લાખ રૂપિયા મળ્યા હોવાની વાતનો ઉલ્લેખ હોવાનું કહેવાય છે. આ ઉપરાંત સમગ્ર વ્યવહારમાં લિંબાયત ઝોનની ભૂમિકા અંગે પણ સવાલો ઊઠ્યા છે.
સૌથી વધુ ચર્ચા ધારાસભ્યના નામે ૧૦ લાખ રૂપિયા લેવામાં આવ્યા હોવાની વાતને લઈને થઈ રહી છે. આ રકમ કોણે લીધી અને કયા હેતુથી લેવામાં આવી હોવાની ચર્ચા છે તે અંગે ભાજપના આંતરિક વર્તુળોમાં સવાલો થઈ રહ્યા છે. જાકે, આ દાવાઓની સ્વતંત્ર પુષ્ટિ થઈ નથી.
આ સમગ્ર વિવાદમાં ભાજપના કોર્પોરેટર ભાઈદાસ પાટીલે પોતાનો પક્ષ રજૂ કર્યો છે. તેમના મોબાઈલમાંથી કથિત રીતે મેસેજ મોકલવામાં આવ્યા હોવાની ચર્ચા વચ્ચે તેમણે આવા કોઈ મેસેજ મોકલ્યા હોવાનો ઇનકાર કર્યો છે. તેમણે આ સમગ્ર મામલે પોતે અજાણ હોવાનું જણાવ્યું છે.
બીજી તરફ, આ મામલે ફરિયાદ કરનારા ભાજપના કાર્યકરો દ્વારા શહેર ભાજપ સંગઠનને જાણ કરવામાં આવી હોવાનો દાવો કરવામાં આવી રહ્યો છે. આ ઘટનાને પગલે પક્ષની અંદર જ બે જૂથો વચ્ચે ખેંચતાણ વધી હોવાની ચર્ચા છે.
આ પ્રકરણમાં ફરિયાદ કરનારા મનીષ નાયકના જણાવ્યા પ્રમાણે, એક ખાતમુહૂર્તના કાર્યક્રમ દરમિયાન આ મામલો સામે આવ્યો હતો. ત્યારબાદ સમગ્ર ઘટનાને લઈને ફરિયાદ કરવામાં આવી હોવાનો તેમનો દાવો છે.
ભાજપના જ કેટલાક કાર્યકરો દ્વારા પક્ષના નેતાઓ અને કોર્પોરેટરો સામે સવાલો ઉઠાવવામાં આવી રહ્યા છે. અન્ય વિસ્તારોમાં પણ કેટલાક કોર્પોરેટરો દ્વારા હપ્તા લેવામાં આવતા હોવાની ચર્ચાઓ થઈ રહી છે. જાકે, આ બાબતોના કોઈ અધિકૃત પુરાવા સામે આવ્યા નથી.
૧૯ લાખ રૂપિયાના કથિત સેટલમેન્ટ અને વાઈરલ ચેટને લઈને વિવાદ વધ્યો હોવા છતાં શહેર ભાજપ સંગઠન તરફથી હજુ સુધી કોઈ સત્તાવાર સ્પષ્ટતા સામે આવી નથી. આ મામલે સંગઠન તપાસ કરાવશે કે પછી કોઈ આંતરિક કાર્યવાહી કરશે તે અંગે પણ ઉત્સુકતા છે.
હવે સૌથી મોટો સવાલ એ છે કે ગેરકાયદે બાંધકામના મામલે ખરેખર ૧૯ લાખ રૂપિયાનું સેટલમેન્ટ થયું હતું કે કેમ? વોર્ડ નંબર ૨૭ના કોર્પોરેટરોને બે-બે લાખ રૂપિયા મળ્યાની વાતમાં કેટલી સચ્ચાઈ છે? ધારાસભ્યના નામે ૧૦ લાખ રૂપિયા કોણે લીધા હોવાની ચર્ચા છે? લિંબાયત ઝોનના અધિકારીઓની કોઈ ભૂમિકા હતી કે કેમ?
આ તમામ સવાલોના જવાબ વાઈરલ ચેટની સત્યતા અને કથિત નાણાકીય વ્યવહારની નિષ્પક્ષ તપાસ બાદ જ મળી શકશે. હાલ આ સમગ્ર મામલો સુરત ભાજપ માટે આંતરિક રાજકીય પડકાર બની રહ્યો છે.