ઓડિશાના મુખ્યમંત્રી મોહન ચરણ માઝીએ વિદ્યાર્થીઓને સોશિયલ મીડિયા અને ખોટી માહિતીનો વધુ પડતો ઉપયોગ ટાળવા અપીલ કરી છે. તેમણે કહ્યું કે વિદ્યાર્થીઓની પ્રાથમિક જવાબદારી જ્ઞાન અને કૌશલ્ય પ્રાપ્ત કરવાની અને પોતાના અને દેશના વિકાસમાં યોગદાન આપવાની છે.
કટકમાં માધ્યમિક બોર્ડ હાઇસ્કૂલમાં શિક્ષક દિવસ નિમિત્તે આયોજિત રાજ્ય સ્તરીય સમારોહને સંબોધતા, મુખ્યમંત્રીએ શિક્ષક-વિદ્યાર્થી સંબંધોના મહત્વ પર ભાર મૂક્્યો. તેમણે કહ્યું, “શિક્ષણ એ માત્ર જ્ઞાન આપવાનું માધ્યમ નથી, પરંતુ તે માનવ વિકાસની એક મહાન પ્રક્રિયા છે.”
ગુરુ-શિષ્ય પરંપરાની સુસંગતતા પર ભાર મૂકતા, તેમણે શિક્ષણ પ્રણાલીને મજબૂત બનાવવા માટે રાજ્ય સરકાર દ્વારા હાથ ધરવામાં આવેલા વિવિધ પગલાંઓની વિગતવાર માહિતી આપી. તેમણે કહ્યું કે સરકાર કેજીથી પીજી સુધી મફત શિક્ષણ, શિશુ વાટિકા કેન્દ્રો અને ૨,૨૦૦ ગોદાબરીશ મિશ્ર મોડેલ પ્રાથમિક શાળાઓના વિકાસ પર કામ કરી રહી છે.
મુખ્યમંત્રીએ જાહેરાત કરી કે ઓડિશા સરકાર આગામી ત્રણ વર્ષમાં શાળાઓમાં ૪૫,૦૦૦ ખાલી શિક્ષકોની જગ્યાઓ ભરશે. તેમણે કહ્યું કે રાજ્ય સરકાર શિક્ષણ ક્ષેત્રે માનવ સંસાધનોને મજબૂત બનાવવા માટે સતત પગલાં લઈ રહી છે.માઝીએ દાવો કર્યો કે ઓડિશા કેજીથી પીજી સુધી મફત શિક્ષણ પૂરું પાડતું દેશનું પ્રથમ રાજ્ય બન્યું છે. તેમણે માહિતી આપી કે રાજ્યમાં ૧૨,૦૦૦ કરોડના ખર્ચે ૨,૨૦૦ ગોદાબરિશ મિશ્ર મોડેલ પ્રાથમિક શાળાઓનું નિર્માણ થઈ રહ્યું છે. આ ઉપરાંત, મુખ્યમંત્રીએ પૂર્વશાળાના બાળકો માટે ૪૫,૦૦૦ શિશુ વાટિકા ખોલવાની પણ માહિતી આપી.
મુખ્યમંત્રીએ રાજ્યમાં વિદ્યાર્થીઓ માટે વિવિધ યોજનાઓનો પણ ઉલ્લેખ કર્યો. આમાં મધ્યાહન ભોજન, ધોરણ ૯ અને ૧૦ ના વિદ્યાર્થીઓ માટે પાઠ્યપુસ્તકો અને આદિવાસી વિદ્યાર્થીઓ માટે શહીદ માધો સિંહ હાથ ખર્ચા યોજનાનો સમાવેશ થાય છે.કાર્યક્રમ દરમિયાન, મુખ્યમંત્રીએ શિક્ષકોના યોગદાનની પ્રશંસા કરી અને વિદ્યાર્થીઓના ભવિષ્યને ઘડવામાં તેમની સમર્પણ માટે ઘણા શિક્ષકોનું સન્માન કર્યું. મુખ્યમંત્રી માઝીએ વિદ્યાર્થીઓને સોશિયલ મીડિયા પર વધુ પડતો સમય બગાડવાને બદલે શિક્ષણ, કૌશલ્ય વિકાસ અને તેમના કારકિર્દીના લક્ષ્યો પર ધ્યાન કેન્દ્રિત કરવા અને આૅનલાઇન ફરતી ખોટી અને ભ્રામક માહિતીથી સાવધ રહેવાની અપીલ કરી. દરમિયાન, બિહારમાં ટીઆરઇ-૪ હેઠળ ૩૨,૦૦૦ થી વધુ જગ્યાઓ પર ભરતી માટે સૂચના જારી કરવામાં આવી છે.
