વલસાડ જિલ્લાના કપરાડા તાલુકાના નિલોશી ગામની પ્રાથમિક શાળાના આચાર્ય શંકર જાધવના મોતનો બનાવ સામે આવતા વિસ્તારમાં ચકચાર મચી છે. પ્રાથમિક માહિતી મુજબ તેઓ છેલ્લા કેટલાક સમયથી શાળાની ઓનલાઈન કામગીરીના ભારણને કારણે તણાવમાં હોવાનું જાણવા મળ્યું છે.ઘટનાની જાણ થતાં કપરાડા પોલીસની ટીમ સ્થળ પર પહોંચી હતી અને તપાસ શરૂ કરી છે. પોલીસને ઘટનાસ્થળેથી એક સ્યુસાઇડ નોટ મળી હોવાનું સામે આવ્યું છે, જેને પોલીસે કબજે કરી વધુ તપાસ હાથ ધરી છે.આચાર્ય શંકર જાધવ પર શાળાની ઓનલાઈન કામગીરીનું વધુ ભારણ હતું કે કેમ અને તેના કારણે તેઓ તણાવમાં હતા કે નહીં, તે સહિતના મુદ્દાઓને પોલીસે તપાસ હેઠળ લીધા છે. સ્યુસાઇડ નોટમાં શું લખવામાં આવ્યું છે અને તેમાં કોઈ વ્યક્તિ કે કારણનો ઉલ્લેખ છે કે નહીં તે અંગે પણ પોલીસ તપાસ કરી રહી છે.કપરાડા પોલીસે સમગ્ર ઘટનાને લઈને જરૂરી કાર્યવાહી શરૂ કરી છે. મૃતદેહને પોસ્ટમોર્ટમ માટે મોકલી વધુ તપાસ હાથ ધરવામાં આવી છે. પોલીસની તપાસ અને સ્યુસાઇડ નોટના આધારે ઘટનાનું ચોક્કસ કારણ જાણવા પ્રયાસ કરવામાં આવી રહ્યો છે.
