રાજકોટમાં અપૂરતા વરસાદને કારણે પીવાના પાણીની ચિંતા વચ્ચે રાહતના સમાચાર સામે આવ્યા છે. સૌની યોજના હેઠળ છેલ્લા બે દિવસથી ન્યારી-૧ ડેમમાં ફરી નર્મદાના નીર ઠાલવવાનું શરૂ કરવામાં આવ્યું છે. આજી-૧ ડેમમાં હજુ પુરવઠો શરૂ થયો નથી, પરંતુ ટૂંક સમયમાં ત્યાં પણ નર્મદાનું પાણી પહોંચાડવામાં આવે તેવી શક્યતા છે. આથી આગામી ઉનાળામાં રાજકોટવાસીઓને પીવાના પાણીની મુશ્કેલી નહીં પડે તેવી આશા છે.
રાજકોટમાં ચાલુ વર્ષે પૂરતો વરસાદ ન પડતાં આજી-૧ અને ન્યારી-૧ ડેમમાં પાણીની નવી આવક ઓછી રહી હતી. પીવાના પાણીની સ્થિતિને ધ્યાનમાં રાખીને રાજકોટ મહાનગરપાલિકાએ રાજ્ય સરકાર પાસે જૂન માસના અંત સુધી તબક્કાવાર ૪૦૦૦ એમએમસીએફટી નર્મદાનીર આપવાની માગણી કરી હતી. જોકે ટેકનિકલ કારણોસર નર્મદાના પાણીનો પુરવઠો લગભગ એક સપ્તાહ માટે અટકાવી દેવામાં આવ્યો હતો.
પાણીકાપની સ્થિતિ ઊભી ન થાય તે માટે રાજકોટ મનપા દ્વારા સિંચાઈ વિભાગ સમક્ષ સતત રજૂઆતો કરવામાં આવી હતી. જેના પગલે હવે સૌની યોજના હેઠળ ન્યારી-૧ ડેમમાં ફરી નર્મદાનું પાણી ઠાલવવાનું શરૂ કરવામાં આવ્યું છે. એક સપ્તાહના વિરામ બાદ પાણી શરૂ થતાં મનપાએ રાહતનો શ્વાસ લીધો છે.
હાલ ન્યારી-૧ ડેમમાં નર્મદાનીર પહોંચાડવામાં આવી રહ્યું છે, જ્યારે આજી-૧ ડેમમાં હજુ પાણી છોડવાની પ્રક્રિયા શરૂ કરવામાં આવી નથી. જોકે આગામી દિવસોમાં આજી-૧માં પણ સૌની યોજના હેઠળ નર્મદાના નીર પહોંચાડવામાં આવે તેવી શક્યતા છે. રાજકોટના મુખ્ય જળસ્રોત એવા આજી-૧ અને ન્યારી-૧ ડેમમાં પાણીની આવક ઓછી રહેતાં ઉનાળામાં પાણીની અછત સર્જાવાની ચિંતા હતી. ન્યારી-૧માં નર્મદાનું પાણી શરૂ થતાં હાલ શહેરમાં પાણીકાપની સંભાવના ઘણી હદે ઘટી છે.
સૌની યોજના હેઠળ નર્મદાના પાણીની આવક ચાલુ રહે અને આજી-૧ ડેમમાં પણ આગામી દિવસોમાં પુરવઠો શરૂ થાય તો રાજકોટના જળસંગ્રહમાં વધારો થશે. જેના કારણે ઉનાળાના દિવસોમાં શહેરના લોકોને નિયમિત પીવાનું પાણી પૂરતા પ્રમાણમાં મળી રહે તેવી શક્યતા છે. રાજકોટ મહાનગરપાલિકા દ્વારા પાણીની સ્થિતિને ધ્યાનમાં રાખીને રાજ્ય સરકાર અને સિંચાઈ વિભાગ સમક્ષ સતત રજૂઆતો કરવામાં આવી હતી. આ પ્રયાસો બાદ ન્યારી-૧માં નર્મદાનીર ફરી શરૂ થતાં શહેર પર તોળાતો પાણીકાપનો ખતરો હાલ પૂરતો ટળી ગયો છે.
