કોંગોના ઉત્તરપશ્ચિમ વિષુવવૃત્ત પ્રાંતમાં એક દુઃખદ અકસ્માત થયો છે. અહીં મોટરાઇઝ્ડ બોટ પલટી જવાથી ઓછામાં ઓછા ૮૬ લોકોના મોત થયા છે. સરકારી મીડિયાએ આ અકસ્માત વિશે માહિતી આપી હતી. સરકારી સમાચાર એજન્સીએ અહેવાલ આપ્યો છે કે આ અકસ્માત બાસંકુસુ પ્રદેશમાં થયો હતો, મૃત્યુ પામેલા મોટાભાગના લોકો વિદ્યાર્થીઓ હતા. હાલમાં, અકસ્માતનું કારણ શું હતું તે સ્પષ્ટ નથી. જાકે, સરકારી મીડિયાએ આ માટે ‘બોટમાં વધુ ભીડ અને રાત્રે નેવિગેશન’ને જવાબદાર ઠેરવ્યું છે.કોંગોમાં પહેલા પણ દુઃખદ અકસ્માતો થયા છે. તાજેતરમાં, અહીં આગ લાગવાથી એક બોટ પલટી ગઈ હતી. આ અકસ્માતમાં ૫૦ લોકોનાં મોત થયા હતા અને સેંકડો લોકો ગુમ થયા હતા. આ અકસ્માત કોંગો નદીમાં થયો હતો. બોટમાં આગ લાગવાથી ઘણા લોકો ખરાબ રીતે દાઝી ગયા હતા. અકસ્માત દરમિયાન ઘણા લોકોને બચાવી પણ લેવામાં આવ્યા હતા. કોંગોમાં આવા અકસ્માતો ઘણીવાર થાય છે કારણ કે ક્ષમતા કરતાં વધુ લોકો બોટમાં સવાર હોય છે. અત્યાર સુધી, આને રોકવા માટે નક્કર પગલાં લેવામાં આવ્યા નથી. કોંગોમાં ઘણી જગ્યાઓ છે જ્યાં લોકો અવરજવર માટે બોટનો ઉપયોગ કરે છે. અહીંના રસ્તાઓ ખરાબ હાલતમાં છે.
