કોડીનારના ઘાંટવડથી મૂળદ્વારકા જતી ગુજરાત પાણી પુરવઠા બોર્ડની મુખ્ય પાઇપલાઇનમાં ભંગાણ કરી પાણી ચોરી કરવા બદલ આલીદર જિલ્લા પંચાયતના કોંગ્રેસ ઉમેદવાર ભીખાભાઇ કાળાભાઇ ગોહીલ સામે ગુનો નોંધવામાં આવ્યો છે. આરોપીએ છેલ્લા ૧૦ વર્ષના લાંબા સમયગાળા દરમિયાન પોતાના અંગત ફાયદા માટે ગેરકાયદેસર જોડાણ મેળવી અંદાજે ૧૫૧ મિલિયન લીટર પાણીની ચોરી કરી હોવાનું સામે આવ્યું છે, જેની અંદાજિત કિંમત ૩.૦૨ લાખ રૂપિયા થાય છે. આ ઉપરાંત સરકારી મિલકતને નુકસાન પહોંચાડવા બદલ પાણી પુરવઠા વિભાગના અધિકારીની ફરિયાદને આધારે કોડીનાર પોલીસે કાયદેસરની કાર્યવાહી હાથ ધરી છે.
