યુનાઇટેડ સ્ટેટ્સ સાથે શાંતિ વાટાઘાટોના બીજા રાઉન્ડની સંભાવનાઓ વચ્ચે ઇરાને એક મોટું નિવેદન આપ્યું છે. ઈરાની સૈન્યનો દાવો છે કે તેણે ઇઝરાયલ અને યુનાઇટેડ સ્ટેટ્સ સામેના યુદ્ધમાં હજુ સુધી તેની મુખ્ય મિસાઇલ ક્ષમતાનો ઉપયોગ કર્યો નથી. તાજેતરના ક્રેમલિન નિવેદનમાં સૂચવવામાં આવ્યું છે કે ઇરાન પાસે રહસ્યમય મિસાઇલો છે અથવા હોઈ શકે છે જેની ક્ષમતાઓ વિશ્વ માટે અજાણ છે. ઈરાનના નિવેદનથી રશિયાના દાવાની પુષ્ટિ થઈ છે. આ દાવાથી અમેરિકા અને ઈઝરાયલ પણ આશ્ચર્યચકિત થઈ ગયા છે, કારણ કે ટ્રમ્પ અને નેતન્યાહૂએ દાવો કર્યો હતો કે ઈરાનની મિસાઈલ સિસ્ટમ સંપૂર્ણપણે નાશ પામી છે.
ઈરાનના સંરક્ષણ મંત્રાલયના પ્રવક્તા, બ્રિગેડિયર જનરલ રેઝા તલાઈ-નિકે શનિવારે એક મહત્વપૂર્ણ નિવેદન બહાર પાડ્યું. તેમણે જણાવ્યું હતું કે તાજેતરના સંઘર્ષ દરમિયાન ઈરાનની મિસાઈલ ક્ષમતાનો મોટો ભાગ જાણી જાઈને ઉપયોગમાં લેવામાં આવ્યો ન હતો. જનરલ તલાઈ-નિકે દાવો કર્યો હતો કે યુદ્ધવિરામ પહેલા સુધી ઈરાની સશસ્ત્ર દળોએ ઈઝરાયલના કબજા હેઠળના પ્રદેશો પર આકાશ પર સંપૂર્ણ નિયંત્રણ જાળવી રાખ્યું હતું. તેમણે ભારપૂર્વક જણાવ્યું હતું કે ઈરાન પાસે હજુ પણ પૂરતી અદ્યતન મિસાઈલો છે, જેનો ઉપયોગ જા જરૂરી હોય તો કરી શકાય છે.
ઈઝરાયલ અને યુનાઇટેડ સ્ટેટ્સ સાથેના યુદ્ધ દરમિયાન, ઈરાની મિસાઈલોએ સમગ્ર મધ્ય પૂર્વમાં વિનાશ મચાવ્યો હતો. ૪૦ દિવસના યુદ્ધ દરમિયાન, ઈરાને તેના બદલો લેવા માટે મિસાઈલો અને ડ્રોનનો ઉપયોગ કર્યો હતો, પરંતુ સંરક્ષણ મંત્રાલયના જણાવ્યા અનુસાર, દેશે તેની સંપૂર્ણ શક્તિ તૈનાત કરી ન હતી. ઈરાની અધિકારીઓ આ માટે તેમની વ્યૂહાત્મક તૈયારીઓને જવાબદાર ગણે છે. જનરલ તલાઈ-નિકે કહ્યું, “અમારી મિસાઈલ ક્ષમતાનો નોંધપાત્ર ભાગ હજુ પણ બિનઉપયોગી છે.” તેમણે એમ પણ કહ્યું કે ઈરાની સૈન્યએ સંઘર્ષ દરમિયાન દુશ્મનના હવાઈ ક્ષેત્ર પર મજબૂત પકડ જાળવી રાખી હતી. ઈરાનના મતે, દેશ સ્થાનિક સ્તરે ૧,૦૦૦ થી વધુ પ્રકારના શસ્ત્રોનું ઉત્પાદન કરે છે, જે તેની સંરક્ષણ ક્ષમતાઓને વધુ મજબૂત બનાવે છે.
રશિયાએ કહ્યું હતું કે ઈરાન પાસે પહેલા ક્યારેય ન જાઈ હોય તેવી ક્ષમતાઓ ધરાવતી મિસાઈલો હોઈ શકે છે. જાહેરાતના થોડા દિવસો પછી જ ઈરાનનો આ દાવો અત્યંત મહત્વપૂર્ણ માનવામાં આવે છે. ઈરાન અને અમેરિકા વચ્ચે તણાવ આ ક્ષેત્રમાં ઊંચો રહે છે. અમેરિકા અને ઈઝરાયલે ઈરાનના પરમાણુ કાર્યક્રમ અને લશ્કરી સ્થાપનોને નિશાન બનાવીને ઈરાન પર હુમલા શરૂ કર્યા. ઈરાને અનેક મિસાઈલ હુમલાઓનો જવાબ આપ્યો, પરંતુ હવે દાવો કરે છે કે તેની મુખ્ય તાકાત અકબંધ છે. ઈરાની પ્રવક્તાએ વધુમાં જણાવ્યું હતું કે દેશ લાંબા સંઘર્ષ માટે સંપૂર્ણપણે તૈયાર છે. તેમણે સુરક્ષા દળો, બાસીજ અને કાયદા અમલીકરણ એજન્સીઓ વચ્ચેના સંકલનની પ્રશંસા કરી અને કહ્યું કે યુદ્ધવિરામ પછી જાહેર ભાગીદારી એક “સામાજિક ચમત્કાર” હતો.
