ઓસ્ટ્રેલિયન વડા પ્રધાન એન્થોની અલ્બેનીઝે વડા પ્રધાન નરેન્દ્ર મોદીની ઓસ્ટ્રેલિયાની નિકટવર્તી મુલાકાત અંગે મહત્વપૂર્ણ નિવેદન આપ્યું છે. કેનબેરામાં સંસદને સંબોધતા, અલ્બેનીઝે કહ્યું કે ભારત, જે પહેલાથી જ વિશ્વનો સૌથી વધુ વસ્તી ધરાવતો દેશ છે, આ દાયકામાં ત્રીજા ક્રમની સૌથી મોટી વૈશ્વીક આર્થિક શક્તિ બનવા માટે તૈયાર છે. તેમણે ભારતને ઓસ્ટ્રેલિયા માટે એક મહત્વપૂર્ણ ભાગીદાર ગણાવ્યું અને બંને દેશો વચ્ચેના મજબૂત સંબંધોની પ્રશંસા કરી.
આ દરમિયાન, ઓસ્ટ્રેલિયામાં ભારતના હાઈ કમિશનર ફિલિપ ગ્રીને સોશિયલ મીડિયા પ્લેટફોર્મ ઠ પર અલ્બેનીઝના સંબોધનનો એક વીડિયો શેર કર્યો. તેમણે લખ્યું કે જ્યારે ઓસ્ટ્રેલિયાના વડા પ્રધાન ભારત વિશે આટલી તાકાત અને ઉત્સાહથી વાત કરે છે, ત્યારે ભારતમાં હાઈ કમિશનર તરીકે સેવા આપવી એ તેમના માટે વધુ સન્માનની વાત છે.
વડાપ્રધાન અલ્બેનીઝે કહ્યું કે ભારતનો આર્થિક વિકાસ ફક્ત એક દેશની સિદ્ધિ નથી, પરંતુ સમગ્ર ઈન્ડો-પેસિફિક ક્ષેત્ર માટે એક મોટી તક છે. તેમણે કહ્યું કે ઓસ્ટ્રેલિયા માત્ર પેસિફિક મહાસાગરનો દેશ નથી પણ હિંદ મહાસાગર ક્ષેત્રનો એક મહત્વપૂર્ણ ભાગ છે, જે બંને દેશો વચ્ચેના સંબંધોને વધુ ગાઢ બનાવે છે. ૨૦૨૨ માં હસ્તાક્ષર કરાયેલા આર્થિક સહયોગ અને વેપાર કરારનો ઉલ્લેખ કરતા તેમણે કહ્યું કે આ કરારથી બંને દેશો વચ્ચેના વેપાર સંબંધોને નવી મજબૂતી મળી છે. વધુમાં, શિક્ષણ, સંસ્કૃતિ અને ક્રિકેટ જેવા ક્ષેત્રોએ પણ બંને દેશોને નજીક લાવ્યા છે.
ભારતની પોતાની ભૂતકાળની મુલાકાતોને યાદ કરતાં, અલ્બેનીઝે કહ્યું કે તેઓ પહેલી વાર ૧૯૯૧ માં બેકપેકર તરીકે ભારત આવ્યા હતા. વડા પ્રધાન બન્યા પછી તેઓ બે વાર ભારતની મુલાકાત લઈ ચૂક્યા છે. તેમણે કહ્યું કે ભારતને ખરેખર સમજવા માટે, બસ અથવા ટ્રેનમાં મુસાફરી કરવી એ શ્રેષ્ઠ અનુભવ છે, કારણ કે તે દેશની વિવિધતાનો અનુભવ કરવા અને નજીકથી હૂંફ મેળવવાની તક આપે છે. વડા પ્રધાને કહ્યું, “મને ટૂંક સમયમાં વડા પ્રધાન મોદીનું સ્વાગત કરવાની તક મળશે, અને તે મારા માટે ખૂબ જ સન્માનની વાત હશે.”
અલ્બેનીઝે ઓસ્ટ્રેલિયામાં ભારતીય સમુદાયની પણ ખુલ્લેઆમ પ્રશંસા કરી. તેમણે કહ્યું કે ભારતીય મૂળના લગભગ ૧૦ લાખ લોકો માત્ર દેશની અર્થવ્યવસ્થાને મજબૂત બનાવી રહ્યા નથી પરંતુ નાના વ્યવસાયો અને સમાજમાં પણ નોંધપાત્ર યોગદાન આપી રહ્યા છે. તેમણે કહ્યું, “તમારા બધાના કારણે આપણો દેશ સુધર્યો છે. મારી સરકાર હંમેશા તમારા હિતોનું રક્ષણ કરશે અને કોઈપણ વિભાજનકારી પ્રયાસોનો વિરોધ કરશે.”
અગાઉ, વડા પ્રધાન નરેન્દ્ર મોદી ઓસ્ટ્રેલિયાના વિદેશ પ્રધાન પેની વોંગ સાથે મળ્યા હતા. બંને નેતાઓએ ભારત-ઓસ્ટ્રેલિયા વ્યાપક વ્યૂહાત્મક ભાગીદારીને વધુ મજબૂત બનાવવા અંગે ચર્ચા કરી. બેઠકની માહિતી આપતાં, વડા પ્રધાન મોદીએ કહ્યું કે બંને દેશો વચ્ચે સંરક્ષણ, વેપાર, ટેકનોલોજી અને સપ્લાય ચેઇનને મજબૂત બનાવવા પર સકારાત્મક વાતચીત થઈ છે. તેમણે જણાવ્યું હતું કે ભારત અને ઓસ્ટ્રેલિયા ખુલ્લા, સુરક્ષિત અને સમૃદ્ધ ઇન્ડો-પેસિફિક ક્ષેત્ર માટે સાથે મળીને કામ કરવાનું ચાલુ રાખશે.
ઓસ્ટ્રેલિયાના વિદેશ પ્રધાન પેની વોંગ ક્વાડ વિદેશ પ્રધાનોની બેઠકમાં ભાગ લેવા માટે ભારતમાં હતા. આ બેઠક દરમિયાન, તેમણે વિદેશ પ્રધાન એસ. જયશંકર સાથે ૧૭મા વિદેશ પ્રધાનોના માળખા સંવાદમાં પણ ભાગ લીધો હતો. બેઠકમાં ઊર્જા, સંરક્ષણ, દરિયાઈ સુરક્ષા, સાયબર ટેકનોલોજી, અવકાશ, મહત્વપૂર્ણ ખનિજા અને રમતગમત સહિત અનેક મુખ્ય મુદ્દાઓ પર ચર્ચા થઈ હતી. બંને દેશોએ ઈન્ડો-પેસિફિક ક્ષેત્ર અને વૈશ્વીક પડકારો પર પણ વિચારોનું આદાન-પ્રદાન કર્યું. ભારત અને ઓસ્ટ્રેલિયા વચ્ચે વધતી જતી વ્યૂહાત્મક ભાગીદારી ભવિષ્યમાં બંને દેશો માટે મહત્વપૂર્ણ આર્થિક અને વ્યૂહાત્મક મહત્વની માનવામાં આવે છે.
