પશ્ચિમ બંગાળમાં રાજકીય પરિવર્તને નવી સરકાર બનાવવાની પ્રક્રિયા પૂર્ણ કરી છે, જેમાં સુવેન્દુ અધિકારીએ રાજ્યના પ્રથમ ભાજપ મુખ્યમંત્રી તરીકે કાર્યભાર સંભાળ્યો છે. દરમિયાન, ભાજપે ૧૮મી વિધાનસભાની કાર્યવાહી ચલાવવા માટે કૂચ બિહાર દક્ષિણથી ધારાસભ્ય રહેલા રથિન્દ્ર બોઝને સ્પીકર પદ માટે પોતાના ઉમેદવાર તરીકે નામાંકિત કર્યા છે. રથિન્દ્ર બોઝ પહેલી વાર ધારાસભ્ય બનેલા છે. રથેન્દ્ર બોઝ રાજકારણમાં પ્રવેશતા પહેલા વ્યવસાયે ચાર્ટર્ડ એકાઉન્ટન્ટ હતા અને હજુ પણ છે.
તેમણે ૧૯૯૦માં ઈન્સ્ટીટ્યૂટ ઓફ ચાર્ટર્ડ એકાઉન્ટન્ટ્સ ઓફ ઇન્ડિયામાંથી ડિગ્રી પૂર્ણ કરી હતી. તેઓ કોસ્ટ એકાઉન્ટન્ટ પણ છે. તેમણે ૨૦૨૬માં કૂચ બિહાર દક્ષિણ બેઠક પરથી પોતાની પહેલી વિધાનસભા ચૂંટણી લડી હતી અને ૨૩,૦૦૦ થી વધુ મતોથી જીત મેળવી હતી.
બુધવારે, પશ્ચિમ બંગાળના મુખ્યમંત્રી સુવેન્દુ અધિકારીએ જાહેરાત કરી હતી કે તેઓ નંદીગ્રામ વિધાનસભા બેઠક પરથી રાજીનામું આપશે અને ભવાનીપુર વિધાનસભા બેઠક જાળવી રાખશે. તેમણે બે બેઠકો – નંદીગ્રામ અને ભવાનીપુર – પરથી ચૂંટણી લડી અને બંને બેઠકો પર જંગી જીત મેળવી. ભવાનીપુરમાં, તેમણે ટીએમસીના વડા અને ભૂતપૂર્વ મુખ્યમંત્રી મમતા બેનર્જીને તેમના જ ગઢમાં હરાવીને મોટો અપસેટ સર્જ્યો, જ્યારે નંદીગ્રામમાં તેમનો વિજયનો સિલસિલો જાળવી રાખ્યો. સુવેન્દુ અધિકારીએ ૯ મેના રોજ પશ્ચિમ બંગાળના મુખ્યમંત્રી તરીકે શપથ લીધા. રાજ્યપાલે રાજભવન ખાતે આયોજિત એક ભવ્ય સમારોહમાં તેમને પદ અને ગુપ્તતાના શપથ લેવડાવ્યા. વિધાનસભા ચૂંટણીમાં ભાજપની પ્રચંડ જીત બાદ તેઓ રાજ્યમાં પાર્ટીના પ્રથમ મુખ્યમંત્રી બન્યા.
