દિલ્હીમાં વિવિધ સરકારી પ્રોજેક્ટ્સ માટે લાંબા સમયથી પડતર જમીન ફાળવણીના મુદ્દાઓ ઉકેલાઈ ગયા છે. દિલ્હીના ઉપરાજ્યપાલ સરદાર ટીએસ સંધુની પહેલ અને વિવિધ વિભાગો વચ્ચે વધુ સારા સંકલન માટેના તેમના નિર્દેશોને પગલે, જમીન ફાળવણી પ્રક્રિયા સુવ્યવસ્થિત કરવામાં આવી છે. આનાથી દિલ્હીમાં શિક્ષણ, આરોગ્ય, સુરક્ષા, પરિવહન, પર્યાવરણ અને પાણી પુરવઠા સંબંધિત અનેક મહત્વપૂર્ણ પ્રોજેક્ટ્સ માટે માર્ગ મોકળો થયો છે.
સત્તાવાર માહિતી અનુસાર, દિલ્હીમાં સુરક્ષા મજબૂત કરવા માટે સાગરપુર, દિલકુશા બાગ, સુયુરપુર અને કિશનગઢમાં નવા પોલીસ સ્ટેશન બનાવવામાં આવશે. નરેલામાં એક અત્યાધુનિક ફોરેન્સીક સાયન્સ લેબ સ્થાપિત કરવામાં આવશે, જ્યારે તાહિરપુર અને ધીરપુરમાં નવા ઇન્ટેલિજન્સ બ્યુરો સ્ટેશન બનાવવામાં આવશે. શાહદરા અને રોહિણીમાં કોર્ટ કર્મચારીઓ માટે રહેણાંક સુવિધાઓના વિકાસ માટે પણ જમીન ફાળવવામાં આવી છે.
શહેરી માળખાગત સુવિધાને મજબૂત બનાવવા માટે, ડ્ઢસ્ઇઝ્ર ને મેટ્રો ડેપો માટે સનોથમાં ૨૦ હેક્ટર અને કાસ્ટિંગ યાર્ડ માટે નરેલામાં ૧૬ હેક્ટર જમીન ફાળવવામાં આવી છે. વધુમાં,એમસીડીને ૨૪ ફિક્સ્ડ કોમ્પેક્ટર ટ્રાન્સફર સ્ટેશનો માટે જમીન ફાળવવામાં આવી છે. દિલ્હી જલ બોર્ડને આઠ સ્થળોએ સીવેજ ટ્રીટમેન્ટ પ્લાન્ટ અને સીવેજ પમ્પીંગ સ્ટેશન બનાવવા માટે જમીન આપવામાં આવી છે.
દિલ્હીની પાણી પુરવઠા વ્યવસ્થાને વધુ મજબૂત બનાવવા માટે ૧૫૧ નવા બોરવેલ માટે પણ મંજૂરી આપવામાં આવી છે. જૌંટીમાં સીવેજ ટ્રીટમેન્ટ પ્લાન્ટ અને સંગમ વિહારમાં ભૂગર્ભ પાણીની ટાંકી માટે પણ જમીન આપવામાં આવી છે. સમુદાય કલ્યાણ અને પર્યાવરણીય સંરક્ષણના ક્ષેત્રોમાં પણ ઘણા મહત્વપૂર્ણ નિર્ણયો લેવામાં આવ્યા છે. દ્વારકા સેક્ટર ૧૯ અને મંગલપુરીમાં સબ-રજિસ્ટ્રાર ઓફિસો માટે કોમ્યુનિટી હોલ બનાવવામાં આવશે.
આ ઉપરાંત, આયુષ્માન આરોગ્ય મંદિરો માટે ૧૧૨ અને અટલ કેન્ટીન માટે પાંચ એનઓસી જારી કરવામાં આવ્યા છે. વધુમાં, હોલંબી કલાનમાં ઈ-વેસ્ટ ઇકો-મેનેજમેન્ટ પાર્ક માટે ૮.૫ હેક્ટર જમીન ફાળવવામાં આવી છે, અને ગાઝીપુરમાં કચરાથી ઊર્જા અને બાયો-મિથેનાઇઝેશન સુવિધાઓને વિસ્તૃત કરવા માટે વધારાની જમીન ફાળવવામાં આવી છે. નરેલા એજ્યુકેશન હબમાં ગુરુ ગોવિંદ સિંહ ઇન્દ્રપ્રસ્થ યુનિવર્સિટી, દિલ્હી ટેકનોલોજીકલ યુનિવર્સિટી અને સેન્ટ્રલ સંસ્કૃત યુનિવર્સિટીને પણ જમીન ફાળવવામાં આવી છે.
