જૂનાગઢના બસ્ટેન્ડ સર્કલ ખાતે યોજાયેલા એક વિશેષ કાર્યક્રમમાં લોકસંગીતના ક્ષેત્રમાં અમર નામ ધરાવતા પદ્મશ્રી દિવાળીબેન ભીલની ૮૫મી જન્મજયંતિની શાનદાર ઉજવણી કરવામાં આવી હતી. આ પ્રસંગે તેમની સ્મૃતિને કાયમી રાખવા માટે એક ભવ્ય પ્રતિમાનું અનાવરણ કરવામાં આવ્યું હતું, જે જૂનાગઢના સાંસ્કૃતિક વારસાને પ્રતિબિંબિત કરે છે.
દિવાળીબેન ભીલનું જીવન સંઘર્ષ અને સિદ્ધિની ગાથા સમાન છે. જૂનાગઢ મ્યુનિસિપલ કોર્પોરેશનમાં એક સામાન્ય તેડાગર તરીકે કાર્યરત હોવા છતાં, તેમણે પોતાના કંઠથી સમગ્ર દેશને મંત્રમુગ્ધ કરી દીધા હતા. જૂનાગઢના પ્રથમ પદ્મશ્રી એવોર્ડ વિજેતા તરીકે તેમણે લોકસંગીત અને ગુજરાતના લોકગીતોને વૈશ્વીક મંચ પર ઓળખ અપાવી હતી, જે આજે પણ દરેક ગુજરાતીના હૃદયમાં જીવંત છે.
આ ભવ્ય પ્રતિમાની ભેટ મુંબઈ સ્થિત હૂંડિયા પરિવાર દ્વારા આપવામાં આવી છે. તેમની આ ઉમદા ભાવનાને કારણે જૂનાગઢના લોકો માટે એક આદર્શ સ્મારક તૈયાર થયું છે. આ પ્રસંગે જૂનાગઢ મનપાના ડેપ્યુટી મેયર, ઉચ્ચ અધિકારીઓ અને અનેક સ્થાનિક અગ્રણીઓ વિશેષ ઉપસ્થિત રહ્યા. તમામ મહાનુભાવોએ દિવાળીબેનના લોકસંગીતના યોગદાનને યાદ કરી તેમને નતમસ્તક ભાવભીની શ્રદ્ધાંજલિ અર્પણ કરી હતી.
બસ્ટેન્ડ સર્કલ ખાતેની આ પ્રતિમા આવનારી પેઢી માટે પ્રેરણારૂપ બની રહેશે. એક તેડાગરથી પદ્મશ્રી સુધીની તેમની સફર સાબિત કરે છે કે કળામાં જો સાચી સાધના હોય તો સામાન્ય વ્યક્તિ પણ ઈતિહાસ રચી શકે છે. આજના આયોજન દ્વારા જૂનાગઢે સાબિત કર્યું છે કે તે પોતાના કલાકારોને હંમેશા સન્માન આપે છે અને તેમની કળાને જીવંત રાખવા માટે કટિબદ્ધ છે.
