ઇઝરાયલી સેનાએ ગાઝામાં હમાસના નવા લશ્કરી વડા મોહમ્મદ ઓદેહને મારી નાખવાનો દાવો કર્યો છે. ઇઝરાયલી સૈન્યના જણાવ્યા અનુસાર, ઓદેહ ૭ ઓક્ટોબર, ૨૦૨૩ ના રોજ ઇઝરાયલ પર થયેલા મોટા હુમલાના “માસ્ટરમાઇન્ડ” પૈકીનો એક હતો. આ લશ્કરી કાર્યવાહી ઇઝરાયલી વડા પ્રધાન બેન્જામિન નેતન્યાહૂ અને સંરક્ષણ પ્રધાન ઇઝરાયલ કાત્ઝના નિર્દેશ પર કરવામાં આવી હતી. વડા પ્રધાન કાર્યાલયે સોશિયલ મીડિયા પ્લેટફોર્મ એકસ પર આ વાતની પુષ્ટિ કરી. ઇઝરાયલના જણાવ્યા અનુસાર, ૭ ઓક્ટોબરના હુમલા દરમિયાન મુહમ્મદ ઓદેહ હમાસના ગુપ્તચર વિભાગના વડા હતા.
મુહમ્મદ ઓદેહને એક અઠવાડિયા પહેલા જ હમાસના લશ્કરી પાંખના નવા વડા તરીકે નિયુક્ત કરવામાં આવ્યા હતા. તેમણે ઇઝ અલ-દિન અલ-હદ્દાદનું સ્થાન લીધું હતું, જે બે અઠવાડિયા પહેલા ગાઝામાં ઇઝરાયલી હુમલામાં માર્યા ગયા હતા. ઇઝરાયલી સૈન્યનું કહેવું છે કે ઓદેહ અસંખ્ય ઇઝરાયલી નાગરિકો અને સૈનિકો સામે હત્યાઓ, અપહરણ અને હુમલાઓમાં સામેલ હતો. વડા પ્રધાન નેતન્યાહૂએ ઠ પર પણ પોસ્ટ કરી હતી, જેમાં કહ્યું હતું કે, “અમે હવે મુહમ્મદ ઓદેહને નિશાન બનાવીને મારી નાખ્યા છે. તે હમાસના લશ્કરી પાંખનો વડા હતો અને ૭ ઓક્ટોબરના હુમલાના મુખ્ય આયોજકોમાંનો એક હતો. અમે આ હુમલામાં સામેલ તમામ લોકોનો પીછો કરીશું.”
આ દરમિયાન, ઇઝરાયલે દક્ષિણ લેબનોનમાં પણ તેના હવાઈ હુમલાઓ તીવ્ર બનાવ્યા છે. મીડિયા અહેવાલો અનુસાર, ટાયર અને મરજાઉન જિલ્લાના ઘણા વિસ્તારોને નિશાન બનાવવામાં આવ્યા હતા. અહેવાલો સૂચવે છે કે બુર્જ રાહલ, કવથારિયાત અલ-રુઝ, સરીફા, અસ-સવાના અને કાબરીખા જેવા વિસ્તારોને નિશાન બનાવવામાં આવ્યા હતા. મંગળવારે દક્ષિણ લેબનોનમાં ઇઝરાયલી હુમલાઓમાં ૩૧ લોકો માર્યા ગયા અને ૪૦ અન્ય ઘાયલ થયા હોવાના અહેવાલ છે. આ હુમલા એવા સમયે થયા છે જ્યારે વડા પ્રધાન નેતન્યાહૂએ રવિવારે સેનાને હિઝબુલ્લાહ સામે કાર્યવાહી વધુ તીવ્ર બનાવવાનો આદેશ આપ્યો હતો.
નેતન્યાહૂએ એક વીડિયો નિવેદનમાં કહ્યું, “અમે હિઝબુલ્લાહ સાથે યુદ્ધમાં છીએ. છેલ્લા કેટલાક અઠવાડિયામાં, અમારા સૈનિકોએ ૬૦૦ થી વધુ આતંકવાદીઓને મારી નાખ્યા છે. પરંતુ અમે હવે અટકવાના નથી. મેં સૈન્યને વધુ આક્રમક કાર્યવાહી કરવાનો નિર્દેશ આપ્યો છે.” ઇઝરાયલને યુનાઇટેડ સ્ટેટ્સ તરફથી એવા સંકેત મળ્યા છે કે તે હિઝબુલ્લાહ સામે એક મોટા લશ્કરી કાર્યવાહીને મંજૂરી આપી રહ્યું છે. ડ્રોન હુમલામાં તાજેતરના વધારા બાદ, ઇઝરાયલે તેની કાર્યવાહી વધુ તીવ્ર બનાવી દીધી છે.
