યુરોપિયન ક્રિકેટમાં એક નવો યુગ શરૂ થવાનો છે. પ્રથમ વખત યુરોપિયન ટી ૨૦ પ્રીમિયર લીગ (ઇટીપીએલ) ૨૬ ઓગસ્ટથી શરૂ થશે. ફાઇનલ ૨૦ સપ્ટેમ્બરના રોજ રમાશે. છ ટીમોની આ ટુર્નામેન્ટમાં વિશ્વના ઘણા પ્રખ્યાત ક્રિકેટરો મેદાનમાં ઉતરશે. રોટરડેમ ડોકર્સ અને એમ્સ્ટરડેમ ફ્લેમ્સ ઓપનિંગ મેચમાં આમને-સામને થશે.ઇટીપીએલની પહેલી સીઝન ૨૬ દિવસની હશે, જેમાં નેધરલેન્ડ્સના વૂરબર્ગ ક્રિકેટ ક્લબ અને આયર્લેન્ડના માલાહાઇડ ખાતે મેચો રમાશે. લીગ સ્ટેજમાં કુલ ૩૦ મેચો રમાશે, જેમાં બધી છ ટીમો ડબલ રાઉન્ડ-રોબિન ફોર્મેટમાં બે વાર એકબીજા સામે ટકરાશે.લીગ સ્ટેજના અંતે પોઈન્ટ ટેબલમાં ટોચ પર રહેનારી ટીમ સીધી ફાઇનલમાં પહોંચશે. બીજા અને ત્રીજા સ્થાને રહેનારી ટીમો ક્વોલિફાયરમાં રમશે, જેમાં વિજેતા ફાઇનલમાં બીજા સ્થાન મેળવશે. પ્રથમ ૧૫ લીગ મેચો નેધરલેન્ડ્સના વૂરબર્ગ ક્રિકેટ ક્લબ ખાતે રમાશે. ત્યારબાદ ટુર્નામેન્ટ આયર્લેન્ડના માલાહાઇડમાં શિફ્ટ થશે, જ્યાં બાકીની લીગ મેચો, ક્વોલિફાયર અને ફાઇનલ યોજાશે. ટીમ ટ્રાવેલ ડે ૭ અને ૮ સપ્ટેમ્બરના રોજ સુનિશ્ચિત થયેલ છે. લીગ સ્ટેજમાં ઘણા ડબલ-હેડર પણ હશે, જેમાં પ્રથમ મેચ સ્થાનિક સમય મુજબ સવારે ૧૧ઃ૩૦ વાગ્યે અને બીજી બપોરે ૩ઃ૧૫ વાગ્યે શરૂ થશે. લીગમાં ઘણા દિગ્ગજ ખેલાડીઓ ભાગ લેશે.
ઇટીપીએલની પહેલી સીઝનમાં અસંખ્ય આંતરરાષ્ટ્રીય સ્ટાર્સ ભાગ લેશે. આમાં સ્ટીવ સ્મિથ, રવિચંદ્રન અશ્વિન, ફાફ ડુ પ્લેસિસ, ગ્લેન મેક્સવેલ, હેનરિક ક્લાસેન, મિશેલ માર્શ, લુંગી ન્ગીડી અને ટ્રેન્ટ બોલ્ટ જેવા મોટા નામોનો સમાવેશ થાય છે. આ ખેલાડીઓની હાજરી ટુર્નામેન્ટને વૈશ્વિક સ્તરે ઓળખ અપાવશે તેવી અપેક્ષા છે.
રોટરડેમ ડોકર્સના સહ-માલિક જાન્ટી રોડ્સે કહ્યું કે તેમને ઇટીપીએલની પહેલી સીઝન શરૂ કરવાનો ગર્વ છે. તેમણે આશા વ્યક્ત કરી કે ટીમ તેમના ઘરઆંગણાના ચાહકો સામે યાદગાર પ્રદર્શન કરશે. દરમિયાન, એમ્સ્ટરડેમ ફ્લેમ્સના સહ-માલિક સ્ટીવ વોએ કહ્યું કે શરૂઆતની મેચ તેમની ટીમ માટે વિશ્વ સમક્ષ તેમની ક્રિકેટ શૈલી દર્શાવવાની એક શ્રેષ્ઠ તક હશે. તેમણે તેને યુરોપિયન ક્રિકેટમાં એક નવા અધ્યાયની શરૂઆત તરીકે વર્ણવી.
ડબલિન ગાર્ડિયન્સના સહ-માલિક રાહુલ દ્રવિડે કહ્યું કે યુરોપની નવી ફ્રેન્ચાઇઝ ટી ૨૦ લીગમાં ડબલિનનું પ્રતિનિધિત્વ કરવું ખૂબ જ રોમાંચક છે. તેમની ટીમ શહેર અને તેના ચાહકો માટે ગૌરવ લાવવા માંગે છે. દરમિયાન, ગ્લાસગો કોસ્મિક્સના સહ-માલિક મેથ્યુ હેડને તેને સ્કોટિશ ક્રિકેટ માટે ઐતિહાસિક ક્ષણ ગણાવી અને કહ્યું કે તેમની ટીમ પહેલી જ મેચથી પોતાની છાપ છોડવા માટે તૈયાર છે.
