અમરેલીમાં રાજ્યકક્ષાના સ્વાતંત્ર્ય પર્વની ઉજવણી અંતર્ગત વિવિધ સ્પર્ધાઓનું આયોજન

અમરેલી જિલ્લામાં ૮૦મા સ્વાતંત્ર્ય પર્વની રાજ્યકક્ષાની ઉજવણી નિમિત્તે જિલ્લા માહિતી કચેરી દ્વારા રીલ અને શોર્ટ ફિલ્મ સ્પર્ધાનું આયોજન કરવામાં આવ્યું છે. જેમાં ‘અમરેલીની ૮ દાયકાની વિકાસયાત્રા’, ‘દેશભક્તિના રંગે રંગાતું અમરેલી’ અને ‘રાજ્ય કક્ષાની ઉજવણી’ જેવા વિષયો પર ૬૦ સેકન્ડની રીલ અથવા ૩ મિનિટની શોર્ટ ફિલ્મ બનાવીને ૫ ઓગસ્ટ ૨૦૨૬ સુધીમાં ઈ-મેઈલ કે રૂબરૂ એન્ટ્રી જમા કરાવી શકાશે. વિજેતાઓને સન્માનપત્ર આપી તેમની કૃતિઓ સોશિયલ મીડિયા પર પ્રસારિત કરાશે.આ ઉપરાંત, શિક્ષણ વિભાગ દ્વારા ૫ થી ૧૪ ઓગસ્ટ દરમિયાન વિદ્યાર્થીઓ માટે તાલુકા અને જિલ્લા કક્ષાએ ચિત્ર, નિબંધ, વકૃત્વ, ક્વિઝ, દેશભક્તિ ગીત, મહેંદી અને વેશભૂષા સ્પર્ધાઓ યોજાશે. આ ઉજવણી અંતર્ગત ૧૦ ઓગસ્ટે વિશ્વ સિંહ દિવસની ઉજવણી અને વૃક્ષારોપણ તેમજ ૧૩ ઓગસ્ટે પ્લાસ્ટિક જાગૃતિ અભિયાન અને પ્રભાતફેરીનું આયોજન કરવામાં આવ્યું છે