હિંમતનગર બાયપાસ રોડ પર આવેલા સિલ્વર પ્લાઝા કોમ્પ્લેક્સના નીરા સ્પા સેન્ટરમાં એએચટીયુની ટીમે રેડ કરી કથિત ગેરકાયદેસર પ્રવૃત્તિ અંગે કાર્યવાહી કરી છે. પોલીસના જણાવ્યા મુજબ, મસાજની આડમાં કથિત રીતે અન્ય પ્રવૃત્તિ ચાલતી હોવાની માહિતી મળ્યા બાદ ડમી ગ્રાહક મારફતે તપાસ હાથ ધરવામાં આવી હતી.
પોલીસને સ્પા સેન્ટરમાં કથિત ગેરકાયદેસર પ્રવૃત્તિ ચાલતી હોવાની માહિતી મળ્યા બાદ એએચટીયુની ટીમે એક ડમી ગ્રાહકને સ્પામાં મોકલ્યો હતો. ડમી ગ્રાહકની મુલાકાત અને મળેલી માહિતીના આધારે ટીમે ત્યારબાદ સ્પા સેન્ટર પર રેડ કરી હતી.
પોલીસના જણાવ્યા મુજબ, તપાસ દરમિયાન ગ્રાહકો પાસેથી પહેલા રૂ.૧,૦૦૦ એન્ટ્રી ફી લેવામાં આવતી હોવાની અને ત્યારબાદ કથિત ‘એક્સ્ટ્રા સર્વિસ’ માટે અલગથી રૂ.૨,૦૦૦થી રૂ.૩,૦૦૦ સુધીની રકમ લેવામાં આવતી હોવાની માહિતી સામે આવી હતી.
રેડ દરમિયાન એએચટીયુની ટીમે સ્પા સેન્ટરમાંથી ત્રણ યુવતીઓને મુક્ત કરાવી હોવાનું પોલીસ દ્વારા જણાવાયું છે. સમગ્ર મામલે જરૂરી કાયદેસરની કાર્યવાહી હાથ ધરવામાં આવી છે. આ ઉપરાંત પોલીસ દ્વારા રૂ.૩,૦૦૦ રોકડ અને બે મોબાઇલ ફોન સહિત કુલ આશરે રૂ.૧૩,૦૦૦નો મુદ્દામાલ કબજે કરવામાં આવ્યો હોવાનું જણાવાયું છે.
આ મામલે સ્પા સંચાલક સહિત બે આરોપીઓ સામે હિંમતનગર ગ્રામ્ય પોલીસ સ્ટેશનમાં ગુનો નોંધવામાં આવ્યો છે. પોલીસે સમગ્ર મામલે વધુ તપાસ હાથ ધરી છે.સ્પા સેન્ટરમાં કથિત રીતે ચાલતી પ્રવૃત્તિ અંગે મળેલી માહિતીના આધારે એએચટીયુ દ્વારા કરવામાં આવેલી કાર્યવાહીને પગલે હિંમતનગરમાં સ્પા સેન્ટરોને લઈને ફરી ચર્ચા શરૂ થઈ છે.
સ્પા સેન્ટર અને આરોપીઓ સામેના ઉપરોક્ત આક્ષેપો પોલીસની પ્રાથમિક માહિતી અને નોંધાયેલી ફરિયાદના આધારે છે. કેસની અંતિમ હકીકત તપાસ અને કાયદાકીય પ્રક્રિયા બાદ સ્પષ્ટ થશે.
