કેન્દ્રીય કાયદા મંત્રી અર્જુન રામ મેઘવાલે રવિવારે જણાવ્યું હતું કે રાષ્ટ્રપતિ દ્રૌપદી મુર્મુએ સુપ્રીમ કોર્ટમાં ન્યાયાધીશોની સંખ્યા ૩૪ થી વધારીને ૩૮ કરવાના કેન્દ્રીય મંત્રીમંડળના નિર્ણયને મંજૂરી આપી છે. અર્જુન રામ મેઘવાલે સોશિયલ મીડિયા પ્લેટફોર્મ ઠ પર એક પોસ્ટમાં જણાવ્યું હતું કે, “રાષ્ટ્રપતિએ સુપ્રીમ કોર્ટ (ન્યાયાધીશોની સંખ્યા) સુધારો વટહુકમ, ૨૦૨૬ જાહેર કરીને સુપ્રીમ કોર્ટમાં ન્યાયાધીશોની સંખ્યા ૩૩ થી વધારીને ૩૭ (ભારતના મુખ્ય ન્યાયાધીશ સિવાય) કરી છે, જે સુપ્રીમ કોર્ટ (ન્યાયાધીશોની સંખ્યા) અધિનિયમ, ૧૯૫૬ માં વધુ સુધારો કરે છે.”
૫ મેના રોજ, વડા પ્રધાન નરેન્દ્ર મોદીની અધ્યક્ષતામાં કેન્દ્રીય મંત્રીમંડળે સુપ્રીમ કોર્ટ (ન્યાયાધીશોની સંખ્યા) સુધારા બિલ, ૨૦૨૬ સંસદમાં રજૂ કરવાના પ્રસ્તાવને મંજૂરી આપી હતી. તેનો હેતુ સુપ્રીમ કોર્ટ (ન્યાયાધીશોની સંખ્યા) અધિનિયમ, ૧૯૫૬ માં સુધારો કરીને ભારતની સુપ્રીમ કોર્ટમાં ન્યાયાધીશોની સંખ્યા વર્તમાન ૩૩ થી વધારીને ૩૭ (ભારતના મુખ્ય ન્યાયાધીશ સિવાય) કરવાનો છે. કાનૂની સમુદાયના સભ્યોએ આ પગલાનું વ્યાપકપણે સ્વાગત કર્યું છે, તેને સુપ્રીમ કોર્ટ સમક્ષ કેસ અને મુકદ્દમાના વધતા જતા બેકલોગને સંબોધવા માટે સમયસરનું પગલું ગણાવ્યું છે.
સુપ્રીમ કોર્ટ બાર એસોસિએશનના પ્રમુખ વરિષ્ઠ એડવોકેટ વિકાસ સિંહે જણાવ્યું હતું કે સુપ્રીમ કોર્ટમાં દાખલ થયેલા કેસોની સંખ્યામાં સતત વધારો થવાને કારણે ન્યાયાધીશોની સંખ્યા વધારવાની લાંબા સમયથી માંગ કરવામાં આવી રહી હતી. તેમણે જણાવ્યું હતું કે સુપ્રીમ કોર્ટના ન્યાયાધીશો દ્વારા કેસોના નિકાલનો દર પ્રશંસનીય રહ્યો છે, પરંતુ કેસોની વિશાળ સંખ્યાને ધ્યાનમાં રાખીને વધુ ન્યાયાધીશોની જરૂર છે. તેમણે માળખાગત સુવિધાઓની જરૂરિયાત પર પણ ભાર મૂક્્યો હતો અને આશા વ્યક્ત કરી હતી કે આ વર્ષના અંત સુધીમાં નવી સુપ્રીમ કોર્ટની ઇમારતનો એક ભાગ કાર્યરત થઈ જશે. તેમના મતે, કોર્ટ ૩૮ ન્યાયાધીશોને આરામથી સમાવી શકે છે, અને એકવાર સંપૂર્ણ નવી ઇમારત કાર્યરત થઈ જાય, તો આગામી વર્ષોમાં આશરે ૫૦ ન્યાયાધીશોની જરૂર પડી શકે છે.
