ભારતે ફરી એકવાર સંયુક્ત રાષ્ટ્ર મહાસભામાં પાકિસ્તાનને સખત ઠપકો આપ્યો. હકીકતમાં, પાકિસ્તાને મહાસભામાં જમ્મુ અને કાશ્મીરનો મુદ્દો ઉઠાવીને ભારતને ઘેરવાનો પ્રયાસ કર્યો હતો, પરંતુ ભારતે તરત જ તેનો કડક જવાબ આપ્યો હતો. ભારતે સ્પષ્ટપણે કહ્યું હતું કે યુએન સુરક્ષા પરિષદમાં સભ્યપદ રાજકીય પ્રચાર માટેનું પ્લેટફોર્મ નથી અને તેનો ઉપયોગ ખોટા અને પક્ષપાતી દાવાઓ ફેલાવવા માટે થવો જાઈએ નહીં. ભારતના કાયમી પ્રતિનિધિ, રાજદૂત પર્વતાનેની હરીશે સ્પષ્ટપણે જણાવ્યું હતું કે જમ્મુ અને કાશ્મીર ભારતનો અભિન્ન ભાગ છે, અને આ સત્યને કોઈ બદલી શકતું નથી.
યુએન જનરલ એસેમ્બલીમાં સુરક્ષા પરિષદના વાર્ષિક અહેવાલ પર ચર્ચા દરમિયાન, પાકિસ્તાનના કાયમી પ્રતિનિધિ, અસીમ ઇફ્તીખર અહેમદે જમ્મુ અને કાશ્મીરનો મુદ્દો ઉઠાવ્યો. પાકિસ્તાન લાંબા સમયથી આંતરરાષ્ટ્રીય પ્લેટફોર્મ પર કાશ્મીર મુદ્દો ઉઠાવી રહ્યું છે. આ વખતે, તેણે યુએનમાં તેના પ્રયાસોનું પુનરાવર્તન કર્યું. પાકિસ્તાન હાલમાં યુએન સુરક્ષા પરિષદનું કામચલાઉ સભ્ય છે, જેનો કાર્યકાળ આ વર્ષે સમાપ્ત થવાનો છે. ભારતે પાકિસ્તાનના આ પગલાને રાજકીય એજન્ડા ગણાવ્યું અને કહ્યું કે તે દરેક વૈશ્વીક પ્લેટફોર્મનો ઉપયોગ પોતાના હિત માટે કરી રહ્યું છે.
ભારતના કાયમી પ્રતિનિધિ, પર્વતાનેની હરીશે, પાકિસ્તાનને સખત ઠપકો આપતા કહ્યું કે જમ્મુ અને કાશ્મીર ભારતનો આંતરિક મામલો છે અને તેને કોઈ બહારની ટિપ્પણીની જરૂર નથી. તેમણે કહ્યું કે પાકિસ્તાન સુરક્ષા પરિષદમાં તેની હાજરીનો દુરુપયોગ કરી રહ્યું છે. ભારતે આરોપ લગાવ્યો કે પાકિસ્તાન સતત ભ્રામક અને ખોટી માહિતી ફેલાવવાનો પ્રયાસ કરે છે. હરીશે કહ્યું કે સુરક્ષા પરિષદમાં સભ્યપદ એક મોટી જવાબદારી ધરાવે છે અને તેનો ઉપયોગ ખોટા પ્રચાર માટે પ્લેટફોર્મ તરીકે થઈ શકતો નથી. તેમણે સ્પષ્ટપણે કહ્યું કે જમ્મુ અને કાશ્મીર ભારતનો અભિન્ન અને અવિભાજ્ય ભાગ હતો, છે અને હંમેશા રહેશે.
ભારતે આ પ્રસંગે સંયુક્ત રાષ્ટ્ર સુરક્ષા પરિષદમાં સુધારાની માંગણીનો પણ પુનરોચ્ચાર કર્યો. ભારતે કહ્યું કે વર્તમાન સુરક્ષા પરિષદ આજના વિશ્વની વાસ્તવિકતાઓને પ્રતિબિંબિત કરતી નથી. ભારતના મતે, ૧૯૪૫ ની ભૂ-રાજકીય પરિસ્થિતિના આધારે સ્થાપિત સિસ્ટમ હવે જૂની થઈ ગઈ છે. ભારતે જણાવ્યું હતું કે ફક્ત કામચલાઉ સભ્યોની સંખ્યા વધારવી પૂરતી નથી; કાયમી અને કામચલાઉ બંને શ્રેણીઓમાં વિસ્તરણ જરૂરી છે. ભારત લાંબા સમયથી સુરક્ષા પરિષદમાં કાયમી સભ્યપદની માંગ કરી રહ્યું છે.
ભારત, બ્રાઝિલ, જર્મની અને જાપાનના જૂથ, ય્૪ એ સુરક્ષા પરિષદનો વિસ્તાર કરવાનો પ્રસ્તાવ મૂકયો છે. આ પ્રસ્તાવમાં વર્તમાન ૧૫-સભ્યોની પરિષદને ૨૫ અથવા ૨૬ સભ્યો સુધી વધારવાની માંગ કરવામાં આવી છે. ભારતનું માનવું છે કે વિશ્વના બદલાતા સત્તા માળખા અને વૈશ્વીક પડકારોને ધ્યાનમાં રાખીને સંયુક્ત રાષ્ટ્રમાં મોટા સુધારા જરૂરી છે. ભારતે સ્પષ્ટપણે સંકેત આપ્યો હતો કે વૈશ્વીક સંસ્થાઓએ વર્તમાન સમયને અનુરૂપ થવું જાઈએ. પાકિસ્તાન પ્રત્યે ભારતના પ્રતિભાવને એક મજબૂત અને કડક રાજદ્વારી સંદેશ માનવામાં આવી રહ્યો છે.
