ગાંધીનગર રાંદેસણમાં આવેલી નિર્માણાધીન ‘સેન્ડલ વુડ’ કન્સ્ટ્રક્શન સાઇટ પર દુર્ઘટના સામે આવી છે. અહીં રાત્રિના સમયે બાંધકામની કામગીરી દરમિયાન છઠ્ઠા માળેથી નીચે પટકાતાં ૧૮ વર્ષીય શ્રમિક યુવતી કાજલ માવીનું મોત નીપજ્યું હતું. આ ઘટનાને પગલે શ્રમિકોની સુરક્ષા અને બાંધકામ સાઇટ પરની વ્યવસ્થાઓ અંગે સવાલો ઊભા થયા છે. ઇન્ફોસિટી પોલીસે સમગ્ર મામલે તપાસ હાથ ધરી
મળતી માહિતી અનુસાર, મૂળ દાહોદ વિસ્તારની વતની કાજલ માવી પરિવાર સાથે મજૂરીકામ માટે ગાંધીનગર આવી હતી. તે અન્ય શ્રમિકો સાથે રાંદેસણની નિર્માણાધીન સાઇટ પર કામ કરી રહી હતી.આ દરમિયાન રાત્રિના સમયે ધાબું ભરવાની કામગીરી ચાલી રહી હતી. તે વખતે યુવતી છઠ્ઠા માળેથી નીચે પટકાઈ હતી. ઊંચાઈ પરથી પડવાને કારણે તેને ગંભીર ઇજાઓ થઈ હતી અને ઘટનાસ્થળે જ તેનું મોત થયું હોવાનું પ્રાથમિક અહેવાલમાં જણાવાયું છે.
આ દુર્ઘટના બાદ બાંધકામ સાઇટ પર કામ કરતા શ્રમિકો માટે જરૂરી સુરક્ષાનાં સાધનો ઉપલબ્ધ હતાં કે નહીં, રાત્રિના સમયે પૂરતી લાઇટિંગની વ્યવસ્થા હતી કે નહીં અને ઊંચાઈ પર કામ કરવા માટે સલામતીના નિયમોનું પાલન થતું હતું કે નહીં તેવા સવાલો ઊભા થયા છે.
પ્રાથમિક અહેવાલમાં સાઇટ પર સુરક્ષાનાં સાધનોના અભાવ અંગે આક્ષેપ કરવામાં આવ્યા છે. જાકે, અકસ્માત કયા ચોક્કસ કારણોસર થયો અને તેમાં કોઈની બેદરકારી હતી કે નહીં તે તપાસ બાદ જ સ્પષ્ટ થશે.
ઇન્ફોસિટી પોલીસ ટીમ ઘટના સ્થળે પહોંચી હતી. પોલીસે યુવતીના મૃતદેહને પોસ્ટમોર્ટમ માટે હોસ્પિટલ ખસેડ્યો હતો અને અકસ્માતે મોત અંગેની નોંધ કરી આગળની કાયદેસરની કાર્યવાહી શરૂ કરી હતી. પોલીસ તપાસમાં અકસ્માતની પરિÂસ્થતિ, બાંધકામ સ્થળે ઉપલબ્ધ સુરક્ષા વ્યવસ્થા અને કામ દરમિયાન અપનાવવામાં આવતી પ્રક્રિયાઓ સહિતના મુદ્દાઓની તપાસ કરવામાં આવશે.
ઘટનાની જાણ થતાં દાહોદ વિસ્તારના કેટલાક સામાજિક આગેવાનો ગાંધીનગર પહોંચ્યા હતા અને પીડિત પરિવારની મુલાકાત લીધી હતી. તેમણે પરિવારને સાંત્વના પાઠવી હતી. સાથે જ શ્રમિકોની સુરક્ષા સુનિશ્ચિત કરવા અને જા કોઈની બેદરકારી સામે આવે તો જવાબદારો સામે કાયદેસરની કાર્યવાહી કરવાની માગ કરી હતી.
આ ઘટનાએ બાંધકામ ક્ષેત્રમાં કામ કરતા શ્રમિકોની સલામતી અંગે ફરી એકવાર ચર્ચા જગાવી છે. હવે પોલીસ તપાસમાં અકસ્માતનાં કારણો અને જવાબદારી અંગે શું વિગતો સામે આવે છે તેના પર સૌની નજર છે.
