રેવન્યુ ઇન્ટેલિજન્સ ડિરેક્ટોરેટના મુંબઈ ઝોનલ યુનિટે એક બહુરાષ્ટ્રીય સોનાની દાણચોરીના રેકેટનો પર્દાફાશ કર્યો છે. અધિકારીઓએ એરપોર્ટ પરથી ૧૦.૭૫ કરોડના મૂલ્યના સોના સાથે છ લોકોની ધરપકડ કરી હતી. ચોક્કસ ગુપ્ત માહિતીના આધારે કાર્યવાહી કરતા, મુંબઈ અધિકારીઓએ છત્રપતિ શિવાજી મહારાજ આંતરરાષ્ટ્રીય એરપોર્ટ પરથી છ આરોપીઓની ધરપકડ કરી હતી.
અધિકારીઓએ વિદેશથી સોનાની દાણચોરીમાં સામેલ એક સંગઠિત સિન્ડીકેટનો પર્દાફાશ કર્યો હતો. આ સિન્ડીકેટમાં દુબઈ, બેંગકોક અને માલે વાયા મુંબઈ મુસાફરી કરતા ટ્રાન્જીટ મુસાફરો તેમજ એરપોર્ટ સ્ટાફના સભ્યોનો સમાવેશ થતો હતો.
૨૯ ઓગસ્ટના રોજ, ડીઆરઆઈ ટીમે “ઓપરેશન મિડનાઈટ ગોલ્ડસ્ટ્રાઈક” હાથ ધર્યું. આ ઓપરેશનના ભાગ રૂપે, અધિકારીઓએ એરપોર્ટ સ્ટાફના એક સભ્યને સોનાની દાણચોરી કરતા પકડ્યો. આરોપી મીણના વેશમાં સોનાની ધૂળ ધરાવતી સાત કેપ્સ્યુલ્સ લઈને એરપોર્ટથી બહાર નીકળી રહ્યો હતો. પૂછપરછ કરતાં, એરપોર્ટ સ્ટાફ મેમ્બરે ખુલાસો કર્યો કે ટ્રાન્જીટ મુસાફરો પણ એરપોર્ટમાંથી સોનાની દાણચોરી અને ચોરી કરવામાં સામેલ હતા.
ડીઆરઆઈ અધિકારીઓ દ્વારા ત્યારબાદની કાર્યવાહીમાં અન્ય સિન્ડીકેટ સભ્યોની ઓળખ અને ધરપકડ કરવામાં આવી અને વધુ સોનાના કેપ્સ્યુલ્સ મળી આવ્યા. કુલ મળીને, ૬.૮૫૯ કિલોગ્રામ ૨૪-કેરેટ સોનાની ધૂળ ધરાવતી ૧૬ કેપ્સ્યુલ્સ મળી આવી, જેની કિંમત આશરે ૧૦.૭૫ કરોડ છે, તે જપ્ત કરવામાં આવી. તેમને કસ્ટમ્સ એક્ટ, ૧૯૬૨ હેઠળ જપ્ત કરવામાં આવ્યા હતા. પાંચ ટ્રાન્જીટ મુસાફરો (બધા બાંગ્લાદેશી નાગરિકો) અને એક એરપોર્ટ સ્ટાફ સભ્ય સહિત તમામ છ વ્યક્તિઓની ધરપકડ કરવામાં આવી હતી. વધુ તપાસ ચાલુ છે.
ડીઆરઆઇએ સંગઠિત દાણચોરીમાં એરપોર્ટ સ્ટાફની સંડોવણીનો પર્દાફાશ કર્યો છે, જેના ગંભીર સુરક્ષા અને આર્થિક પરિણામો આવી શકે છે. વધુમાં, આ કામગીરી સતત, ગુપ્ત માહિતી આધારિત કાર્યવાહી દ્વારા સંગઠિત દાણચોરી નેટવર્કનો સામનો કરવા અને સોનાના ગેરકાયદેસર વેપારને રોકવા માટે ડીઆરઆઇની સતત પ્રતિબદ્ધતા દર્શાવે છે. અગાઉ, અમદાવાદ એરપોર્ટ પર ૪૯ લાખથી વધુનું સોનું જપ્ત કરવામાં આવ્યું હતું.
સીઆઇએસએફના કર્મચારીઓએ બુધવારે બેંગલુરુ એરપોર્ટ પર દુબઈથી પરત ફરતા એક ભારતીય મુસાફરને પકડી પાડ્યો હતો, જેમાં તેના મોંમાં ૮૨ ગ્રામ સોનાની કેપ્સ્યુલ છુપાવેલી હતી. સીઆઇએસએફના એક અધિકારીએ જણાવ્યું હતું કે કેમ્પેગૌડા આંતરરાષ્ટ્રીય એરપોર્ટના ટર્મિનલ ૧ પર સવારે ૭ઃ૩૦ વાગ્યે ધરપકડ કરવામાં આવી હતી. પુરુષ મુસાફર ગાઝિયાબાદ જતી ફ્લાઇટમાં ચઢવા માટે સુરક્ષા તપાસમાંથી પસાર થઈ રહ્યો હતો. તેમણે જણાવ્યું હતું કે મુસાફર દુબઈથી વહેલી સવારે ફ્લાઇટમાં બેંગલુરુ પહોંચ્યો હતો.
અધિકારીના જણાવ્યા અનુસાર, “મુસાફરોની નિયમિત સુરક્ષા તપાસ દરમિયાન,સીઆઇએસએફના કર્મચારીઓએ જોયું કે મુસાફર શંકાસ્પદ વર્તન કરી રહ્યો હતો અને પ્રશ્નોના યોગ્ય જવાબ આપી રહ્યો ન હતો.” તેમણે જણાવ્યું હતું કે મુસાફરના મોંમાંથી આશરે ૮૨ ગ્રામ શંકાસ્પદ સોનું ધરાવતી બે કેપ્સ્યુલ મળી આવી હતી. અધિકારીના જણાવ્યા અનુસાર, વ્યક્તિની ધરપકડ કરવામાં આવી હતી અને વધુ તપાસ માટે સ્થાનિક પોલીસને સોંપવામાં આવી હતી. તેમણે ઉમેર્યું હતું કે કેપ્સ્યુલમાં છુપાયેલ શંકાસ્પદ સોનું શુદ્ધતા પરીક્ષણ માટે મોકલવામાં આવ્યું છે.
