ઉના તાલુકાના સામતેર ગામમાં VCE ની જગ્યા લાંબા સમયથી ખાલી છે. તેના કારણે ગ્રામજનો અને ખેડૂતોને સરકારી કામ માટે બીજા ગામો અથવા ઉના શહેરમાં જવું પડે છે. ઉપસરપંચ સંજયસિંહ ગોહિલે તાત્કાલિક નિમણૂક માટે તાલુકા વિકાસ અધિકારી ઉના અને ધારાસભ્ય કાળુભાઈ રાઠોડને લેખિત રજૂઆત કરી છે. તેમણે અગાઉ મંગાવેલી અરજીઓના આધારે ભરતી પ્રક્રિયા પૂરી કરીને નિમણૂક કરવા જણાવ્યું છે. જગ્યા ભરવા માટે પંચાયતે અગાઉ જાહેરાત આપીને ઉમેદવારો પાસેથી અરજી મગાવી હતી. જોકે, ભરતીની આગળની પ્રક્રિયા હજી પૂરી થઈ નથી. ગામમાં VCE ન હોવાથી ૭/૧૨ અને ૮-અના ઉતારા, આવક અને જાતિના દાખલા તથા સરકારી યોજનાઓનાં ઓનલાઈન ફોર્મ ભરવા જેવા ડિજિટલ કામ માટે લોકોને બહાર જવું પડે છે અને તેથી તેમનો સમય અને નાણાં ખર્ચાય છે.








































