ભોપાલમાં ખૂબ જ પ્રસિદ્ધ ત્વીષા શર્મા શંકાસ્પદ મૃત્યુ કેસમાં ધરપકડ કરાયેલા તેમના સાસુ, નિવૃત્ત જિલ્લા અને સત્ર ન્યાયાધીશ ગિરિબાલા સિંહ અને પતિ, એડવોકેટ સમર્થ સિંહે કોર્ટના આદેશ છતાં સેન્ટ્રલ બ્યુરો ઓફ ઇન્વેસ્ટીગેશનને તેમના અવાજના નમૂના આપવાનો ઇનકાર કર્યો હતો. મંગળવારે ભોપાલ જિલ્લા કોર્ટમાં સુનાવણી દરમિયાન, કોર્ટે બંને આરોપીઓની ન્યાયિક કસ્ટડી ૨૮ જુલાઈ સુધી લંબાવી હતી.
ગિરિબાલા સિંહ અને સમર્થ સિંહ મંગળવારે ભોપાલ સેન્ટ્રલ જેલમાંથી વીડિયો કોન્ફરન્સિંગ દ્વારા કોર્ટમાં હાજર થયા. સુનાવણી દરમિયાન,સીબીઆઇએ કોર્ટને જાણ કરી કે તેની ટીમ ૬ જુલાઈએ બંને આરોપીઓ પાસેથી અવાજના નમૂના લેવા માટે ભોપાલ સેન્ટ્રલ જેલની મુલાકાત લીધી હતી. કોર્ટનો આદેશ બતાવ્યા પછી, બંને આરોપીઓએ શરૂઆતમાં વિલંબ કર્યો. બાદમાં, સમર્થ સિંહે અવાજના નમૂના આપવાનો સ્પષ્ટ ઇનકાર કર્યો.
સીબીઆઈના જણાવ્યા મુજબ, ગિરિબાલા સિંહે શરૂઆતમાં અવાજનો નમૂનો આપ્યો હતો, પરંતુ તેનો રેકોર્ડ કરેલો અવાજ તેના વાસ્તવિક અવાજથી અલગ હોવાનું જાણવા મળ્યું. જ્યારે અધિકારીઓએ તેના વાસ્તવિક અવાજમાં બીજા નમૂનાની વિનંતી કરી, ત્યારે તેણીએ ઇનકાર કર્યો. ત્યારબાદ, સીબીઆઈએ કોર્ટમાં અરજી રજૂ કરી, જેમાં બંને આરોપીઓ પાસેથી અવાજના નમૂના ફરીથી લેવાની પરવાનગી માંગવામાં આવી.
સુનાવણી દરમિયાન, ૨૪ મેના રોજ ભોપાલ એઈમ્સ ખાતે દિલ્હી એઈમ્સ મેડિકલ બોર્ડ દ્વારા કરવામાં આવેલા ત્વીષા શર્માના બીજા પોસ્ટમોર્ટમનો અંતિમ ફોરેન્સીક રિપોર્ટ પણ કોર્ટમાં રજૂ કરવામાં આવ્યો ન હતો. એવું કહેવામાં આવ્યું હતું કે પોસ્ટમોર્ટમ હાઈકોર્ટના આદેશ પર કરવામાં આવ્યું હતું, તેથી રિપોર્ટ સીધો જિલ્લા કોર્ટમાં મોકલવામાં આવ્યો ન હતો. જિલ્લા કોર્ટને હજુ સુધી હાઈકોર્ટ તરફથી આ રિપોર્ટ મળ્યો નથી.
ત્વીષા શર્માના પરિવારનું પ્રતિનિધિત્વ કરતા એડવોકેટ શુભાંગી દીક્ષિતે જણાવ્યું હતું કે ભોપાલ એમ્સએ કોર્ટને જાણ કરી છે કે પોસ્ટમોર્ટમ રિપોર્ટ અને તમામ સંબંધિત દસ્તાવેજા સીબીઆઇને પહેલાથી જ સબમિટ કરવામાં આવ્યા છે, અને તેથી, અલગ રિપોર્ટ આપવામાં આવશે નહીં. જોકે, આ સંદર્ભમાં દિલ્હી એમ્સ તરફથી હજુ સુધી કોઈ જવાબ મળ્યો નથી. પરિવારે ભોપાલ એમ્સજી પોસ્ટમોર્ટમ રિપોર્ટની નકલ માંગતી કોર્ટમાં અરજી દાખલ કરી હતી.
સીબીઆઈના સૂત્રોના જણાવ્યા અનુસાર, મધ્યપ્રદેશ હાઈકોર્ટના આદેશ બાદ એજન્સીએ ૨૫ મેના રોજ કેસની તપાસ હાથ ધરી હતી. તપાસ એજન્સી હાલમાં ઉપલબ્ધ પુરાવા, પોસ્ટમોર્ટમ રિપોર્ટ અને ફોરેન્સીક પુરાવાના આધારે કાયદાકીય ૬૦ દિવસની અંદર ચાર્જશીટ દાખલ કરવાની તૈયારી કરી રહી છે, જેથી આરોપીઓ ડિફોલ્ટ જામીન મેળવી શકતા નથી. જો ચાર્જશીટ નિર્ધારિત સમયગાળામાં દાખલ કરવામાં ન આવે, તો આરોપી ઉચ્ચ અદાલતોમાંથી જામીન મેળવવા માટે પાત્ર બની શકે છે.
