રવિવારે સવારે બંગાળની ખાડીમાં ભૂકંપ આવ્યો. આંધ્રપ્રદેશના દરિયાકાંઠાના શહેર કાકીનાડાથી ૨૨૫ કિલોમીટર દૂર ભૂકંપનું કેન્દ્ર હતું. ભૂકંપનું કેન્દ્ર સપાટીથી ૧૦ કિલોમીટર નીચે હતું. આંધ્રપ્રદેશના અનેક શહેરોમાં ભૂકંપના આંચકા અનુભવાયા હતા. વિશાખાપટ્ટનમમાં પણ ભૂકંપના કારણે લોકો ઘરોમાંથી બહાર નીકળી આવ્યા હતા. જાકે, કોઈ જાનહાનિ થઈ નથી.રવિવારે સવારે આંધ્રપ્રદેશના દરિયાકાંઠે બંગાળની ખાડીમાં ૪.૫ ની તીવ્રતાનો હળવો ભૂકંપ આવ્યો. વિશાખાપટ્ટનમ શહેરના ઘણા ભાગોમાં આંચકા અનુભવાયા. ઇન્ડિયન નેશનલ સેન્ટર ફોર ઓશન ઇન્ફર્મેશન સર્વિસીસ અનુસાર, ભૂકંપ સવારે ૫ઃ૦૫ઃ૪૬ વાગ્યે ૧૦ કિલોમીટરની ઊંડાઈએ આવ્યો હતો. તેનું કેન્દ્રબિંદુ ૧૬.૮૦૫° ઉત્તર અક્ષાંશ અને ૮૪.૩૮૧° પૂર્વ રેખાંશ પર, બંગાળની ખાડીમાં કાકીનાડા કિનારાથી લગભગ ૨૨૫ કિલોમીટર દૂર હતું.
“રવિવારે સવારે બંગાળની ખાડીમાં રિક્ટર સ્કેલ પર ૪.૫ ની તીવ્રતાનો હળવો ભૂકંપ આવ્યો હતો, અને વિશાખાપટ્ટનમ શહેરના ઘણા ભાગોમાં હળવા આંચકા અનુભવાયા હતા,” એક પ્રકાશનમાં જણાવાયું છે. તેમાં જણાવાયું છે કે ભૂકંપને કારણે કોઈ જાનહાનિ, મિલકતને નુકસાન અથવા અન્ય કોઈ નુકસાનના અહેવાલ નથી. પ્રકાશનમાં વધુમાં જણાવાયું છે કે ભૂકંપ હળવા હતા અને રહેવાસીઓમાં ગભરાટના કોઈ અહેવાલ નથી.
શનિવારે વહેલી સવારે મહારાષ્ટ્રના હિંગોલી જિલ્લામાં ભૂકંપના આંચકા અનુભવાયા હતા. કોઈ જાનહાનિ થઈ ન હતી. અધિકારીઓના જણાવ્યા અનુસાર, શનિવારે સવારે ૧૧ઃ૨૬ વાગ્યે હિંગોલીમાં ૩.૫ ની તીવ્રતાનો ભૂકંપ નોંધાયો હતો. તેમણે જણાવ્યું હતું કે ભૂકંપનું કેન્દ્ર જમીનથી ૫ કિલોમીટર નીચે હતું.
ગુરુવારે મહારાષ્ટ્રના હિંગોલી અને પડોશી જિલ્લાઓ પરભણી અને નાંદેડમાં પણ આવા જ આંચકા અનુભવાયા હતા. ગુરુવારે આ ત્રણ જિલ્લામાં ચાર આંચકા અનુભવાયા હતા. અધિકારીઓએ જણાવ્યું હતું કે ગુરુવારે સવારે ૧ઃ૩૭ થી ૩ઃ૨૩ વાગ્યા દરમિયાન આ આંચકા ૩.૬ થી ૪.૬ ની તીવ્રતા સુધીના હતા.
