આમ આદમી પાર્ટી (આપ) ના રાષ્ટ્રીય સંયોજક અને દિલ્હીના ભૂતપૂર્વ મુખ્યમંત્રી અરવિંદ કેજરીવાલે આજે એક પ્રેસ કોન્ફરન્સ યોજી હતી, જેમાં ઈ૨૦ પેટ્રોલના ભાવ ઘટાડવાની અપીલ કરવામાં આવી હતી. તેમણે વડા પ્રધાન નરેન્દ્ર મોદીને ઈ૨૦ ઇંધણના ભાવ ઘટાડવા વિનંતી કરી હતી, અને દલીલ કરી હતી કે તેના ઓછા માઇલેજને કારણે તેની કિંમત પણ ઘટાડવી જોઈએ. કેજરીવાલે વડા પ્રધાન સાથે મુલાકાતનો સમય પણ માંગ્યો છે.
આમ આદમી પાર્ટીના રાષ્ટ્રીય સંયોજક અરવિંદ કેજરીવાલે કહ્યું, “મેં વડા પ્રધાન મોદીને ઈ૨૦ પેટ્રોલના ભાવ ઘટાડવા વિનંતી કરી છે કારણ કે તેનું ઓછું માઇલેજ એટલે કે તેની કિંમત પણ ઘટાડવી જાઈએ. મેં તેમની સાથે મુલાકાતનો સમય પણ માંગ્યો છે. હું દરેકને કહેવા માંગુ છું કે જેઓ આ બધાથી નાખુશ છે તેઓ વીડિયો બનાવીને સોશિયલ મીડિયા પર પોસ્ટ કરે કારણ કે આ સરકાર આટલી સરળતાથી અમારી વાત સાંભળશે નહીં.”
કેજરીવાલે વડા પ્રધાન નરેન્દ્ર મોદીને પત્ર લખ્યો છે, જેમાં ઈ૨૦ ઇંધણને લઈને કેન્દ્ર સરકાર પર નિશાન સાધ્યું છે. તેમણે દેશભરના લોકોને પડતી વધતી સમસ્યાઓ પર પ્રકાશ પાડ્યો છે અને બે મુખ્ય માંગણીઓ કરી છે. પત્રમાં કેજરીવાલે લખ્યું છે કે લોકશાહીમાં લોકોનો અવાજ સાંભળવો જ જોઇએ. દેશભરના લોકો ઈ૨૦ પેટ્રોલથી નાખુશ છે. વાહન માલિકોનું કહેવું છે કે ઈ૨૦ ભર્યા પછી, તેમના વાહનોનું માઇલેજ નોંધપાત્ર રીતે ઘટી ગયું છે અને એન્જીનના ભાગોને નુકસાન થઈ રહ્યું છે.
કેજરીવાલની બે મુખ્ય માંગણીઓ ૧. શુદ્ધ પેટ્રોલ (ઈ૦ અથવા ઈ૧૦) અને ઈ૨૦ બંને દરેક પેટ્રોલ પંપ પર ઉપલબ્ધ કરાવવા જોઈએ જેથી ગ્રાહકો તેમની પસંદગીનું ઇંધણ પસંદ કરી શકે. ૨. ઈ૨૦ ની કિંમત ઓછી માઇલેજને કારણે શુદ્ધ પેટ્રોલ કરતા ઓછી રાખવી જોઈએ.
કેજરીવાલે પ્રધાનમંત્રી સાથે મુલાકાતની વિનંતી કરી છે જેથી તેઓ જનતાના અનુભવો અને તકનીકી સમસ્યાઓ વિશે વિગતવાર જણાવી શકે. તેમણે કહ્યું, “હું જનતા વચ્ચે ગયો છું અને તેમની સમસ્યાઓ સાંભળી છું.અરવિંદ કેજરીવાલે આજે “સ્ટોપ ઈ૨૦ પેટ્રોલ” ઓનલાઈન સહી ઝુંબેશ શરૂ કરી. કેજરીવાલે આરોપ લગાવ્યો કે સરકાર યોગ્ય તૈયારી વિના દેશ પર ઈ૨૦ પેટ્રોલ લાદી રહી છે, જ્યારે લાખો વાહન માલિકો ઓછા માઇલેજ, એન્જીન સમસ્યાઓ અને વધેલા ખર્ચની ફરિયાદ કરી રહ્યા છે. આમ છતાં, સરકાર લોકોની ચિંતાઓ સાંભળવાને બદલે, બધું સામાન્ય બતાવવાનો પ્રયાસ કરી રહી છે. તેમણે કહ્યું કે આ ઝુંબેશ દ્વારા, લોકો વડા પ્રધાનને સંબોધિત અરજી પર સહી કરીને પોતાનો અવાજ નોંધાવી શકે છે. આપ પાર્ટીએ વડા પ્રધાનને સંબોધિત એક ઓનલાઈન અરજી શરૂ કરી છે, જ્યાં લોકો પોતાના અનુભવો શેર કરી શકે છે. કેજરીવાલે પાર્ટીના કાર્યકરો અને સામાન્ય નાગરિકોને પેટ્રોલ પંપની મુલાકાત લેવા, લોકો સાથે વાત કરવા, વીડિયો રેકોર્ડ કરવા અને સોશિયલ મીડિયા પર શેર કરવા અપીલ કરી હતી જેથી સરકાર પર દબાણ લાવી શકાય.
કેજરીવાલે કહ્યું કે આ મુદ્દો વાહન માલિકો, ઓટો ઉદ્યોગ અને ગ્રાહક અધિકારોને લગતો છે. ઘણા નિષ્ણાતો અને ઓટોમેકર્સ પહેલાથી જ ઈ-૨૦ ની અસર અંગે ચિંતા વ્યક્ત કરી ચૂક્યા છે. કેજરીવાલે પેપર લીક સામે ચાલી રહેલા “કોકરોચ જનતા પાર્ટી” આંદોલનને ટેકો આપ્યો અને કેન્દ્રીય મંત્રી ધર્મેન્દ્ર પ્રધાનના રાજીનામાની માંગણીનો પુનરાવર્તિત કર્યો. તેમણે સોનમ વાંગચુકને તેમની ભૂખ હડતાળ સમાપ્ત કરવા વિનંતી કરી.
