અમરેલી જિલ્લાના ધારી તાલુકાના જર ગામમાંથી ચિંતાજનક ઘટના સામે આવી છે. ગામ નજીક આવેલી ડેમની કેનાલના માપ લેવલ માટે બનાવવામાં આવેલા કૂવામાં મોટી માત્રામાં મેડિકલ વેસ્ટ મળી આવ્યો હોવાનું સામે આવ્યું છે. ઘટનાની જાણ થતાં સ્થાનિકોમાં ભારે રોષ અને ચિંતાનો માહોલ સર્જાયો છે.
સ્થાનિકોના જણાવ્યા અનુસાર, કૂવામાં પડેલો મેડિકલ વેસ્ટ લાંબા સમયથી ત્યાં હોવાની શક્્યતા છે. સૌથી મોટી ચિંતા એ છે કે આ કચરો કેનાલના પાણી સાથે ભળી શકે છે, જેના કારણે પાણી પ્રદૂષિત થવાની અને આસપાસના વિસ્તારોમાં રહેતા લોકોના આરોગ્ય પર ગંભીર અસર થવાની આશંકા વ્યક્ત કરવામાં આવી રહી છે.
મેડિકલ વેસ્ટ માં ઉપયોગમાં લેવાતી સિરિન્જ, ગ્લોવ્સ, ડ્રેસિંગ સામગ્રી, દવાઓના અવશેષો અને અન્ય બાયોમેડિકલ કચરો હોય તો તે ચેપજન્ય રોગો ફેલાવવાનું કારણ બની શકે છે. તેથી આવા કચરાનો વૈજ્ઞાનિક રીતે નિકાલ કરવો જરૂરી માનવામાં આવે છે.ઘટનાને લઈને સ્થાનિક લોકોએ સંબંધિત વિભાગો સામે નારાજગી વ્યક્ત કરી છે. જવાબદાર વ્યક્તિઓ અથવા સંસ્થાઓ સામે કડક કાર્યવાહી કરવામાં આવે તેમજ સમગ્ર મેડિકલ વેસ્ટનો તાત્કાલિક નિકાલ કરવામાં આવે તેવી માંગ ઉઠી છે.
સ્થાનિકોએ પ્રશાસનને કેનાલ અને આસપાસના વિસ્તારની તપાસ કરીને પાણીની ગુણવત્તાની ચકાસણી કરવાની પણ અપીલ કરી છે, જેથી કોઈપણ પ્રકારનું આરોગ્ય સંકટ ઊભું ન થાય.હાલ સમગ્ર મામલે સંબંધિત વિભાગ દ્વારા તપાસ હાથ ધરાય તેવીશક્યતા છે. જા મેડિકલ વેસ્ટ ગેરકાયદેસર રીતે ફેંકવામાં આવ્યો હોવાનું સામે આવશે તો જવાબદારો સામે કાયદેસરની કાર્યવાહી થઈ શકે છે.
