કોંગ્રેસના સંદેશાવ્યવહારના પ્રભારી મહાસચિવ જયરામ રમેશે ઠ પર એક કાવ્યાત્મક પોસ્ટમાં કહ્યું, “ટ્રમ્પનો નવો ખેલઃ તેમના દિલ્હીના મિત્રને કહ્યું, ‘તમે પુતિન પાસેથી તેલ ખરીદી શકો છો, આ અમેરિકન બ્લેકમેલ ક્યાં સુધી ચાલુ રહેશે?'”
ઈરાન સાથે વધતા સંઘર્ષ વચ્ચે, અમેરિકાએ રશિયન તેલ ખરીદી પર ૩૦ દિવસની કામચલાઉ છૂટની જાહેરાત કરી છે. યુએસ ટ્રેઝરી સેક્રેટરી સ્કોટ બેસન્ટે ગુરુવારે જણાવ્યું હતું કે રાષ્ટ્રપતિ ટ્રમ્પની ઉર્જા નીતિને કારણે તેલ અને ગેસનું ઉત્પાદન રેકોર્ડ સ્તરે પહોંચી ગયું છે. વૈશ્વિક બજારમાં તેલનો પ્રવાહ જાળવી રાખવા માટે, ટ્રેઝરી વિભાગ ભારતીય રિફાઇનરીઓને રશિયન તેલ ખરીદવાની મંજૂરી આપવા માટે ૩૦ દિવસની કામચલાઉ છૂટ આપી રહ્યું છે.
બેસન્ટે સ્પષ્ટતા કરી હતી કે આ ઇરાદાપૂર્વકના ટૂંકા ગાળાના પગલાથી રશિયન સરકારને નોંધપાત્ર નાણાકીય લાભ થશે નહીં, કારણ કે તે ફક્ત સમુદ્રમાં પહેલાથી જ ફસાયેલા તેલને લગતા વ્યવહારોને જ અધિકૃત કરે છે. તેમણે એમ પણ કહ્યું હતું કે ભારત એક મહત્વપૂર્ણ યુએસ ભાગીદાર છે, અને વોશિંગ્ટનને આશા છે કે નવી દિલ્હી યુએસ તેલની ખરીદીમાં વધારો કરશે. આ કામચલાઉ પગલાથી વૈશ્વિક ઉર્જા બજારને બંધક બનાવવાના ઈરાનના પ્રયાસથી દબાણ ઓછું થશે.
નોંધનીય છે કે યુએસ રાષ્ટ્રપતિ ડોનાલ્ડ ટ્રમ્પે અગાઉ ભારત દ્વારા રશિયન તેલની ખરીદી પર ૨૫ ટકા દંડાત્મક ટેરિફ લાદ્યો હતો. તે સમયે, વહીવટીતંત્રે દલીલ કરી હતી કે દિલ્હીની ખરીદી યુક્રેન સામે રશિયાના યુદ્ધને વેગ આપી રહી છે.
ગયા મહિને, યુએસ અને ભારતે વેપાર પર વચગાળાના કરાર માટે માળખા પર પહોંચવાની જાહેરાત કરી હતી. આ પછી, ટ્રમ્પે ભારત પર લાદવામાં આવેલા ૨૫ ટકા દંડાત્મક ટેરિફને હટાવવાનો એક્ઝીક્યુટિવ ઓર્ડર જારી કર્યો હતો, જેમાં મોસ્કોથી ઉર્જા આયાત બંધ કરવાની અને યુએસ ઉર્જા ઉત્પાદનોની ખરીદી વધારવાની નવી દિલ્હીની પ્રતિબદ્ધતાને સ્વીકારવામાં આવી હતી.
