ગૃહમંત્રી સમ્રાટ ચૌધરી સહિત રાજ્ય સરકારે સ્વીકાર્યું છે કે પટનાના શંભુ ગર્લ્સ હોસ્ટેલમાં નીટ પરીક્ષાની તૈયારી કરી રહેલી વિદ્યાર્થીનીનું મૃત્યુ આત્મહત્યા નહીં, પરંતુ હત્યા હતી. સમ્રાટ ચૌધરીએ શનિવારે સવારે માહિતી આપી હતી કે મુખ્યમંત્રી નીતિશ કુમારે પટનામાં નીટ વિદ્યાર્થીની હત્યાની સીબીઆઈ તપાસ માટે ભારત સરકારને વિનંતી કરી છે, જેથી પારદર્શક અને ન્યાયી તપાસ થાય.
મુખ્યમંત્રી નીતિશ કુમારે ભારત સરકારને વિનંતી કરી છે કે કેસ નંબર ૧૪/૨૬ હેઠળ નોંધાયેલા કેસમાં સેન્ટ્રલ બ્યુરો ઓફ ઇન્વેસ્ટગેશન તપાસનો આદેશ આપવામાં આવે. તેમણે કહ્યું કે આ મામલો અત્યંત ગંભીર છે અને સત્ય બહાર લાવવા અને ગુનેગારોને કડક સજા મળે તે સુનિશ્ચિત કરવા માટે નિષ્પક્ષ, પારદર્શક અને ન્યાયી તપાસની જરૂર છે.
મુખ્યમંત્રીએ સ્પષ્ટતા કરી કે રાજ્ય સરકાર પીડિત પરિવારને ન્યાય આપવા માટે સંપૂર્ણપણે પ્રતિબદ્ધ છે. તેમણે આશા વ્યક્ત કરી કે સીબીઆઈ તપાસથી ઘટનાનો ઝડપી ઉકેલ આવશે અને સમગ્ર કેસમાં કોઈપણ સ્તરે કોઈપણ બેદરકારી કે કાવતરું બહાર આવશે. આ ઘટનાને લઈને રાજ્યભરમાં આક્રોશનું વાતાવરણ છે, અને વિદ્યાર્થીઓની સલામતી પર પ્રશ્નો ઉભા થઈ રહ્યા છે. વિપક્ષી પક્ષના નેતાઓ આ બાબતે સતત પ્રશ્નો ઉઠાવી રહ્યા છે. તેજસ્વી યાદવે સ્પષ્ટપણે કહ્યું છે કે નીતિશ કુમાર સરકારમાં દીકરીઓ સુરક્ષિત નથી.
નાયબ મુખ્યમંત્રી અને ગૃહમંત્રી સમ્રાટ ચૌધરીના નિવાસસ્થાને એક ઉચ્ચ સ્તરીય સમીક્ષા બેઠક બોલાવવામાં આવી હતી. તપાસના બિંદુઓને જાડવા અને ગુનેગારો પર કડક કાર્યવાહી કરવા માટે કડક માર્ગદર્શિકા જારી કરવામાં આવી હતી. રાજ્યના મુખ્ય સચિવ પ્રત્યય અમૃત,ડીજીપી વિનય કુમાર, પટના આઇજી અને નાયબ મુખ્યમંત્રી સહિત વિશેષ તપાસ ટીમના ઉચ્ચ અધિકારીઓ આ મહત્વપૂર્ણ બેઠકમાં હાજર રહ્યા હતા. બેઠક દરમિયાન, નાયબ મુખ્યમંત્રીએ અત્યાર સુધી હાથ ધરાયેલી તપાસની વિગતવાર સમીક્ષા કરી. અહેવાલ છે કે ગૃહમંત્રી સમ્રાટ ચૌધરીએ સ્પષ્ટપણે જણાવ્યું હતું કે આ સંવેદનશીલ બાબતમાં કોઈપણ સ્તરે બેદરકારી સહન કરવામાં આવશે નહીં. તેમણે એસઆઇટીને તપાસ ઝડપી બનાવવા અને વૈજ્ઞાનિક પુરાવાના આધારે શક્ય તેટલી વહેલી તકે સત્ય ઉજાગર કરવાનો નિર્દેશ આપ્યો. આ પહેલા,ડીજીપી વિનય કુમારે તેમના નિવાસસ્થાને પોલીસ અધિકારીઓ સાથે એક અલગ વિચાર-વિમર્શ સત્ર પણ યોજ્યું હતું.
