ઇંગ્લેન્ડ સામેની પ્રથમ ટી૨૦ મેચમાં ભારતીય ટીમના નવા કેપ્ટન શ્રેયસ ઐયરે શાનદાર પ્રદર્શન કરીને એક મોટો રેકોર્ડ પોતાના નામે કર્યો છે. ચેસ્ટર-લે-સ્ટ્રીટ ખાતે રમાયેલી અને વરસાદને કારણે રદ થયેલી આ મેચમાં ઐયરે ૪૭ બોલમાં ૬૮ રનની શાનદાર ઇનિંગ રમી હતી. આ સાથે જ તે ઇંગ્લેન્ડની ધરતી પર ટી૨૦ આંતરરાષ્ટ્રીય મેચમાં અડધી સદી ફટકારનાર પ્રથમ ભારતીય કેપ્ટન બની ગયો છે.આ શાનદાર ઇનિંગ દરમિયાન ઐયરે ભૂતપૂર્વ કેપ્ટન વિરાટ કોહલીનો આઠ વર્ષ જૂનો રેકોર્ડ પણ તોડ્યો છે. આ અગાઉ ઇંગ્લેન્ડમાં ભારતીય કેપ્ટન તરીકે સર્વોચ્ચ વ્યક્તિગત સ્કોરનો રેકોર્ડ કોહલીના નામે હતો, જેણે ૨૦૧૮માં કાર્ડિફ ખાતે ૪૭ રન બનાવ્યા હતા.મેચમાં જ્યારે ભારતીય ટીમે શરૂઆતમાં જ મહત્વની વિકેટો ગુમાવી દીધી હતી, ત્યારે ઐયરે મોરચો સંભાળ્યો હતો. તેણે અભિષેક શર્મા (૫૯ રન) સાથે મળીને ઇનિંગને સ્થિર કરી અને ટીમને ૨૦ ઓવરમાં ૧૮૯ રનના મજબૂત સ્કોર સુધી પહોંચાડી હતી. આ મેચમાં ૩૭ રન પૂરા કરતાની સાથે જ ઐયરે આંતરરાષ્ટ્રીય ક્રિકેટના ત્રણેય ફોર્મેટ (ટેસ્ટ, વનડે અને ટી૨૦)માં મળીને પોતાના ૫,૦૦૦ રન પણ પૂરા કરી લીધા છે. તેણે અત્યાર સુધી ૧૪૭ આંતરરાષ્ટ્રીય મેચોમાં ૩૯.૬૧ની સરેરાશથી ૫,૦૩૧ રન બનાવ્યા છે.
