છત્તીસગઢના શક્તિ જિલ્લામાં વેદાંત પાવર પ્લાન્ટ બ્લાસ્ટ કેસમાં પોલીસે મોટી કાર્યવાહી કરી છે. શક્તિના પોલીસ અધિક્ષક પ્રફુલ ઠાકુરે જણાવ્યું હતું કે પોલીસે વેદાંત રિસોર્સિસ લિમિટેડના સ્થાપક અને ચેરમેન અનિલ અગ્રવાલ, કંપનીના મેનેજર દેવેન્દ્ર પટેલ અને અન્ય જવાબદાર અધિકારીઓ અને કર્મચારીઓ વિરુદ્ધ ડાભરા પોલીસ સ્ટેશનમાં એફઆઈઆર દાખલ કરી છે. પોલીસના જણાવ્યા અનુસાર, કંપનીના ચેરમેન સહિત આઠ જવાબદાર અધિકારીઓ વિરુદ્ધ એફઆઈઆર દાખલ કરવામાં આવી છે. પ્લાન્ટના વડા દેવેન્દ્ર પટેલ વિરુદ્ધ પણ કેસ દાખલ કરવામાં આવ્યો છે. અત્યાર સુધીમાં અકસ્માતમાં ૨૦ કામદારોના મોત થયા છે.
પોલીસ અધિક્ષક (એસપી) પ્રફુલ ઠાકુરે જણાવ્યું હતું કે ડાભરા પોલીસ સ્ટેશનમાં ભારતીય દંડ સંહિતાની કલમ ૧૦૬ (બેદરકારીથી મૃત્યુનું કારણ), ૨૮૯ (મશીનરી સંબંધિત બેદરકારીભર્યું વર્તન) અને ૩(૫) હેઠળ કેસ નોંધવામાં આવ્યો છે. એસપીએ જણાવ્યું હતું કે એફઆઈઆરમાં વેદાંત ગ્રુપના ચેરમેન અનિલ અગ્રવાલ સહિત આઠથી દસ લોકોના નામ છે. જા તપાસ દરમિયાન વધારાના વ્યક્તિઓ જવાબદાર જણાશે, તો તેમના નામ પણ ઉમેરવામાં આવશે.
તેમણે જણાવ્યું હતું કે ઘટનાની તપાસ ચાલી રહી છે અને અનેક રિપોર્ટની રાહ જાવાઈ રહી છે. આમાં મૃતકોના પોસ્ટમોર્ટમ રિપોર્ટ, ફોરન્સિક સાયન્સ લેબોરેટરી અને ઔદ્યોગિક આરોગ્ય અને સલામતી વિભાગના રિપોર્ટનો સમાવેશ થાય છે. પોલીસ અધિક્ષકે જણાવ્યું હતું કે વિસ્ફોટના કારણની તપાસ માટે એક ટેકનિકલ ટીમ પણ બનાવવામાં આવી છે. બધા રિપોર્ટ મળ્યા પછી, જા જરૂર પડે તો વધારાના વિભાગો ઉમેરવામાં આવશે.
પાવર પ્લાન્ટમાં વિસ્ફોટ ૧૪ એપ્રિલના રોજ થયો હતો. બોઈલરથી ટર્બાઇન સુધી હાઇ-પ્રેશર વરાળ લઈ જતી સ્ટીલ પાઇપ ફાટી ગઈ, જેના કારણે ઘણા કામદારો ગંભીર રીતે દાઝી ગયા. આ ઘટનામાં ૨૦ લોકો માર્યા ગયા અને ૧૬ ઘાયલ થયા. ટેકનિકલ નિષ્ણાતોની મદદથી કેસની સંપૂર્ણ તપાસ કરવા માટે એક ખાસ તપાસ ટીમની રચના કરવામાં આવી છે. આ ટીમનું નેતૃત્વ અધિક પોલીસ અધિક્ષક પંકજ પટેલ કરી રહ્યા છે અને તેમાં સબ-ડિવિઝનલ પોલીસ અધિકારી સુમિત ગુપ્તા, ફોરન્સિક નિષ્ણાત સૃષ્ટિ સિંહ અને સ્ટેશન હાઉસ ઓફિસર રાજેશ પટેલનો સમાવેશ થાય છે. વહીવટીતંત્રે ગુનેગારો સામે કડક કાર્યવાહી અને પીડિતોના પરિવારોને શક્ય તમામ સહાયનું વચન આપ્યું છે.
