પાકિસ્તાનના ઉત્તરપશ્ચિમ પ્રાંત ખૈબર પખ્તુનખ્વામાં શુક્રવારે રાત્રે લગ્ન સમારંભ દરમિયાન શાંતિ સમિતિના સભ્યના નિવાસસ્થાને આત્મઘાતી હુમલો થયો. હુમલામાં ઓછામાં ઓછા પાંચ લોકો માર્યા ગયા અને દસ ઘાયલ થયા. ડેરા ઇસ્માઇલ ખાન જિલ્લાના જિલ્લા પોલીસ અધિકારી સજ્જાદ અહમદ સાહિબઝાદાએ પુષ્ટિ આપી હતી કે આ હુમલો એક આત્મઘાતી બોમ્બ વિસ્ફોટ હતો જે કુરેશી મોરહ નજીક શાંતિ સમિતિના વડા નૂર આલમ મહેસુદના નિવાસસ્થાને લગ્ન સમારોહ દરમિયાન થયો હતો. હુમલા સમયે મહેમાનો નાચતા હોવાનું કહેવાય છે. વિસ્ફોટને કારણે રૂમની છત તૂટી પડી હતી, જેના કારણે બચાવ પ્રયાસોમાં અવરોધ ઉભો થયો હતો અને કાટમાળ નીચે ફસાયેલા લોકો સુધી પહોંચવામાં મુશ્કેલી પડી હતી. જિલ્લા મુખ્યાલયની હોસ્પિટલમાં કટોકટી જાહેર કરવામાં આવી છે.
એક નિવેદનમાં, ખૈબર પખ્તુનખ્વા રેશ્ક્યું ૧૧૨૨ ના પ્રવક્તા બિલાલ અહમદ ફૈઝીએ જણાવ્યું હતું કે પાંચ મૃતદેહો અને ૧૦ ઘાયલોને હોસ્પિટલ માં લઈ જવામાં આવ્યા છે. તેમણે ઉમેર્યું હતું કે માહિતી મળતાં જ સાત એમ્બ્યુલન્સ, એક ફાયર એન્જીન અને એક ડિઝાસ્ટર રિલીફ વાહન ઘટનાસ્થળે પહોંચી ગયું છે અને બચાવ કામગીરી ચાલી રહી છે. અધિકારીઓએ વિસ્તારને ઘેરી લીધો છે અને ઘટનાની તપાસ શરૂ કરી છે. પ્રારંભિક અહેવાલો અનુસાર, શાંતિ સમિતિના નેતા વાહિદુલ્લાહ મહેસુદ, જેને જીગરી મહેસુદ તરીકે પણ ઓળખવામાં આવે છે, તે મૃતકોમાં સામેલ હતા. ખૈબર પખ્તુનખ્વાના મુખ્ય પ્રધાન સોહેલ આફ્રિદીએ વિસ્ફોટની સખત નિંદા કરી અને કેપી પોલીસ મહાનિરીક્ષક પાસેથી રિપોર્ટ માંગ્યો. તેમણે જણાવ્યું હતું કે ગુનેગારોને ન્યાયના કઠેડામાં લાવવામાં આવશે.
આ મહિનાની શરૂઆતમાં, સશ† હુમલાખોરોએ ખૈબર પખ્તુનખ્વાના બન્નુ જિલ્લામાં શાંતિ સમિતિના ચાર સભ્યોની હત્યા કરી હતી. નવેમ્બર ૨૦૨૫ માં, ખૈબર પખ્તુનખ્વાના બન્નુ જિલ્લામાં શાંતિ સમિતિના કાર્યાલય પર થયેલા હુમલામાં સાત લોકો માર્યા ગયા હતા. પોલીસ અધિકારીઓએ જણાવ્યું હતું કે મૃતકોમાં “ગુડ તાલિબાન”નો સમાવેશ થાય છે, જે રાજ્ય સમક્ષ આત્મસમર્પણ કરનાર ભૂતપૂર્વ આતંકવાદીનો ઉલ્લેખ કરે છે, અને બાકીના તેના સંબંધીઓ હતા.
